ប្រធានអង្គការបរិស្ថានមួយត្រូវឃាត់ខ្លួនក្រោយទិញសាច់សត្វព្រៃហូបហើយគំរាមអ្នកលក់ទៀត

កងរាជអាវុធហត្ថរាជធានីភ្នំពេញបានឃាត់ខ្លួនប្រធានអង្គការអភិរក្សបរិស្ថាន និងអភិវឌ្ឍន៍ជនបទ និងបុគ្គលិក៤នាក់បន្ទាប់ពីទិញសាច់សត្វព្រៃហូប ហើយគំរាមទារលុយអ្នកលក់ថែមទៀត។

រឿងរ៉ាវនេះកើតឡើងនៅថ្ងៃទី៩ ខែកុម្ភៈ បន្ទាប់ពីពួកគេទាំង៥នាក់ បានបន្លំខ្លួនធ្វើជាអ្នកទិញសាច់សត្វព្រៃ ហើយឃាត់ខ្លួនប្រជាពលរដ្ឋជាអ្នកលក់ដើម្បីគំរាមទារប្រាក់ចំនួន៥លានរៀល នៅភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ។

កងរាជអាវុធហត្ថរាជធានីភ្នំពេញនៅថ្ងៃទី១២ ខែកុម្ភៈនេះបានបញ្ជាក់ថា ជនសង្ស័យទាំង០៥នាក់បានរៀបគម្រោងឃាត់ខ្លួនស្ត្រីអ្នកលក់សត្វព្រៃម្នាក់ ដោយចាប់យកសត្វអណ្ដើក ០៥ក្បាល ពស់វែក ០១ក្បាល និងពស់ចាន់ល្មម ០២ក្បាល ព្រមទាំងបានគំរាមទារប្រាក់ចំនួន ០៥លានរៀល តែស្ត្រីនោះសុំត្រឹមចំនួន ៣០០ដុល្លារអាមេរិក ជាថ្នូរឲ្យស្ត្រីម្នាក់នោះរួចខ្លួនត្រឡប់ទៅលំនៅដ្ឋានវិញ។

តាមចម្លើយសារភាពនេះមិនមែនជាលើកទី១នោះទេដោយកន្លងមកពេលរកឃើញករណីបទល្មើសកើតឡើង ក្រុមអង្គការបរិស្ថានមួយនេះតែងតែទទួលយកលុយពីពួកឈ្មួញដែលបានសូកប៉ាន់ ជាច្រើនលើកច្រើនសារ។

បច្ចុប្បន្នអាវុធហត្ថបានកសាងសំណុំរឿងជនសង្ស័យទាំង៥នាក់នេះទៅកាន់សាលាដំបូងរាជធានីភ្នំពេញដើម្បីចាត់ការតាមនីតិវិធីច្បាប់ហើយ៕  

អត្ថបទដោយ ហ៊ុន សិរីវឌ្ឍន៍