អាជ្ញាធរឃុំកណ្ដឹង អំពាវនាវឲ្យពលរដ្ឋឈប់បន្តធ្វើស្រូវប្រាំងបន្ថែម ដោយសារកម្រិតកម្ពស់ទឹកក្នុង​អាងទន្លេបាទីស្រកចុះខ្លាំង

អាជ្ញាធរឃុំកណ្ដឹង នៃរដ្ឋបាលស្រុកបាទី ខេត្តតាកែវ អំពាវនាវឲ្យប្រជាពលរដ្ឋក្នុងមូលដ្ឋានឃុំកណ្ដឹង សូមកុំបន្តបង្កបង្កើនផលស្រូវរដូវប្រាំងជាលើកទី២បន្ថែមទៀត ដោយកម្រិតកម្ពស់ទឹកក្នុងអាងទន្លេបាទីមានការស្រកចុះយ៉ាងខ្លាំង។

ការអំពាវនាវបែបនេះ ធ្វើឡើងបន្ទាប់ពីអាជ្ញាធរឃុំ សង្កេតឃើញស្ថានភាពទឹកក្នុងអាងទន្លេបាទី មានកម្រិតកម្ពស់ទឹកក្នុងអាងមានការស្រកចុះយ៉ាងខ្លាំង ដែលបរិមាណទឹកនេះពុំអាចបន្តបូមទម្លាក់តាមប្រឡាយមេ ហនុមាន សម្រាប់ផ្គត់ផ្គង់ក្នុងការស្រោចស្រពស្រូវរដូវប្រាំងរបស់ប្រជាពលរដ្ឋបានតទៅមុខទៀតនោះទេ។

យោងតាមសេចក្ដីជូនដំណឹង កាលពីថ្ងៃទី១១ ខែកុម្ភៈ ឆ្នាំ២០២៥ លោក ស្រី សំបូរ មេឃុំកណ្ដឹង នៃរដ្ឋបាលស្រុកបាទី បានលើកឡើងថា ដើម្បីបង្ការទប់ស្កាត់កុំឱ្យខាតបង់ផលប្រយោជន៍របស់ប្រជាកសិករ រដ្ឋបាលឃុំកណ្តឹង សូមជម្រាបជូនដំណឹងដល់លោក លោកស្រី មេភូមិ មេភូមិរង សមាជិកភូមិ ព្រមទាំងប្រជាកសិករទាំងអស់ សូមមេត្តាកុំបន្តធ្វើការបង្កបង្កើនផលស្រូវរដូវប្រាំងជាលើកទី២ បន្តទៀត ពីព្រោះប្រភពទឹកក្នុងអាងទន្លេបាទីពុំអាចផ្គត់ផ្គង់ទឹកសម្រាប់ស្រោចស្រពបានគ្រប់គ្រាន់តាមតម្រូវការនោះទេ។

លោកមេឃុំបានសង្កត់ធ្ងន់ថា ក្នុងករណីប្រជាពលរដ្ឋនៅតែបន្តធ្វើស្រូវរដូវប្រាំងជាលើកទី២ទៀត រដ្ឋបាលឃុំ ពុំទទួលខុសត្រូវឡើយ៕