កម្លាំងអន្តរាគមន៍តំបន់ប្រតិបត្តិការសឹករងកំពង់ធំ ចុះបង្ក្រាបបទល្មើសនេសាទខុសច្បាប់

កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បន្តសហការជាមួយកម្លាំងចម្រុះបង្ក្រាបបទល្មើសនេសាទខុសច្បាប់ នៅតំបន់កោះតាបរះ ឃុំផាត់សណ្តាយ ស្រុកកំពង់ស្វាយ ដោយកម្ទេចចោល លប លូ និងស្បៃមុងខុសច្បាប់ប្រមាណជិត ១ពាន់ម៉ែត្រ។

នៅថ្ងៃទី១៨ ខែកុម្ភៈ ឆ្នាំ២០២៥ កងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដឹកនាំដោយលោកវរសេនីយ៍ទោ សេង សំអុល មេបញ្ជាការកងកម្លាំងអន្តរាគមន៍ សហការជាមួយមន្ត្រីជលផល សង្កាត់ផាត់សណ្ដាយ កងកម្លាំងប្រដាប់អាវុធទាំងបី និងមន្ត្រីឧទ្យានុរៈតំបន់រ៉ាំសា ចុះបង្ក្រាបបទល្មើសនេសាទខុសច្បាប់ នៅតំបន់កោះតាបរះ ក្នុងឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ។

ក្នុងឱកាសនោះ លោកវរសេនីយ៍ទោ សេង សំអុល បញ្ជាក់ថា ដោយអនុវត្តតាមបទបញ្ជារបស់ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងអនុប្រធានអចិន្ត្រៃយ៍គណៈកម្មការការពារទប់ស្កាត់ និងបង្ក្រាបបទ ល្មើសធនធានធម្មជាតិខេត្តកំពង់ធំ កងកម្លាំងអន្តរាគមន៍ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បន្តសហការជាមួយ កម្លាំងចម្រុះប្រចាំការបង្ក្រាបបទល្មើសនេសាទនៅឃុំផាត់សណ្ដាយ ចេញធ្វើសកម្មភាព នៅតំបន់កោះតាបរះ នៅលើផ្ទៃបឹងទន្លេសាប ឃុំផាត់សណ្តាយ ដោយបានបំផ្លាញចោល របាំងសាច់អួនខុសច្បាប់ ដែលមានប្រវែងជាង ៨០០ ម៉ែត្រ កម្ទេចចោល លប លូសាច់អួន របាំងស្បៃមុង ចំនួន ២០មាត់ បង្គោលរបាំងចំនួនជាង ៩០០ ដើម និងចាក់លែងត្រីចម្រុះប្រមាណជិត ២០គីឡូក្រាម។

លោកវរសេនីយ៍ទោ បញ្ជាក់បន្ថែមថា កងកម្លាំងអន្តរាគមន៍ និងកងកម្លាំងចម្រុះទាំងអស់ បានខិតខំបំពេញភារកិច្ចប្រកប ដោយស្មារតីទទួលខុសត្រូវខ្ពស់ ក្នុងការគោរពអនុវត្តតាមបទបញ្ជារបស់ប្រមុខថ្នាក់ដឹកនាំនៃរាជរដ្ឋាភិបាល និងបទបញ្ជារបស់អ្នកដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ព្រមទាំងការណែនាំរបស់លោក នួន ផា័រត្ន ប្រធានគណៈបញ្ជាការឯកភាពរដ្ឋបាលខេត្តកំពង់ធំ ដើម្បីគ្រប់គ្រងធនធានមច្ឆ:ជាតិ ឲ្យសំបូរឡើងវិញ សម្រាប់បម្រើសេចក្តីត្រូវការរបស់ប្រជាជនកម្ពុជា និងការពារធនធានធម្មជាតិ សម្រាប់កូនចៅយើងនៅជំនាន់ក្រោយៗបន្តទៀត៕

អត្ថបទ៖ ឈាង មករា