ស្នងការខេត្តកំពង់ធំ ដាក់គោល​ការណ៍​៧ចំណុច ដល់កងកម្លាំងដើម្បីបង្ការទប់ស្កាត់បទល្មើសគ្រប់ប្រភេទ

លោកឧត្តមសេនីយ៍ទោ ហេង សុផល ស្នងការនៃស្នងការដ្ឋាននគរបាលខេត្តកំពង់ធំ បានដាក់គោលការណ៍សំខាន់ៗ៧ចំណុច ដល់កងកម្លាំងដើម្បីបង្ការ និងទប់ស្កាត់បទល្មើសគ្រប់ប្រភេទ ជាពិសេសធានារក្សាសន្តិសុខ សុវត្ថិភាព សណ្ដាប់ធ្នាប់ ជូនប្រជាពលរដ្ឋ។

កិច្ចប្រជុំប្រចាំខែ និងត្រីមាសទី១ ដើម្បីត្រួតពិនិត្យលើបញ្ហាប្រឈមក្នុងការអនុវត្តតួនាទី ភារកិច្ច កាលពីថ្ងៃទី១៩ ខែកុម្ភៈ ឆ្នាំ២០២៥ លោកឧត្តមសេនីយ៍ទោ ស្នងការខេត្ត បានលើកឡើងថា សុខសុវត្ថិភាពរបស់ប្រជាពលរដ្ឋនៅគ្រប់មូលដ្ឋាន គឺជាកត្តាសំខាន់បំផុត ដែលត្រូវការជាចាំបាច់នូវការចូលរួមពីគ្រប់ផ្នែកពាក់ព័ន្ធ ក្នុងនោះមន្រ្តីនគរបាលជាតិ គឺជាមូលដ្ឋានកម្លាំងពិសេស ក្នុងការអនុវត្តផងដែរ។ ដូច្នេះចាំបាច់ត្រូវអនុវត្តប្រកបដោយសីលធម៌ និងវិជ្ជាជីវៈ ដែលត្រូវពង្រឹងលើគោលការណ៍សំខាន់ៗ៧ចំណុច គឺការងារព្រហ្មទណ្ឌ ត្រូវបង្កើនការអនុវត្តច្បាប់ សំដៅបង្ការទប់ស្កាត់បទល្មើស លួច ឆក់ ប្លន់ ក្មេងទំនើង ល្បែងស៊ីសង និងបង្ក្រាបទាន់ពេលវេលា និងមានប្រសិទ្ធភាពខ្ពស់ ការងារប្រឆាំងបទល្មើសគ្រឿងញៀន ត្រូវបង្ក្រាបដូចភ្លៀងរលឹម ការងារចរាចរណ៍ផ្លូវគោក ត្រូវរឹតបន្តឹងការអនុវត្តច្បាប់ចរាចរណ៍ ផ្លូវគោកតាមគោលការណ៍ ការងារអន្តោប្រវេសន៍ ពង្រឹងការគ្រប់គ្រងវត្តមានជនបរទេស ដែលស្នាក់នៅក្នុងមូលដ្ឋានទូទាំងខេត្ត ការងារអត្តសញ្ញាណកម្ម បន្តបង្កើនការផ្តល់សេវារដ្ឋបាល ជូនប្រជាពលរដ្ឋ ប្រកបដោយទំនុកចិត្ត ជាពិសេសបន្តថែរក្សាកត្តាសាមគ្គី ឯកភាពផ្ទៃក្នុង ចេះជួយគ្នាក្នុងគ្រាជួបទុក្ខលំបាក។

លោកឧត្តមសេនីយ៍ទោ ផ្ដាំផ្ញើដល់ប៉ុស្តិ៍នគរបាលរដ្ឋបាលឃុំ សង្កាត់ ដែលជួបបញ្ហាប្រឈម នៅមូលដ្ឋានមិនអាចដោះស្រាយបាន ត្រូវស្នើកម្លាំងពីអធិការដ្ឋាននគរបាលស្រុក-ក្រុង ឬពីស្នងការដ្ឋាន នគរបាលខេត្ត តាមការកំណត់ណាមួយដើម្បីជួយសភាពការណ៍ ដល់់ប៉ុស្តិ៍នគរបាលរដ្ឋបាល (ជូនសេនាធិការ និងធនធានពិនិត្យ)។ ត្រូវមានការផ្លាស់ប្ដូរវេនប្រចាំការ២៤ម៉ោងលើ ២៤ម៉ោង ក្នុងអង្គភាពសម្រាប់កិច្ចប្រតិបត្តិការ រក្សា ការពារ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។ បង្កើនការផ្សព្វផ្សាយគោលនយោបាយ “ភូមិ-ឃុំ-សង្កាត់មានសុវត្ថិភាព” តាមវេទិកាសាធារណៈ ដល់មហាជន គ្រប់ស្រទាប់វណ្ណៈ ដើម្បីលើកកម្ពស់ការយល់ដឹង និងចូលរួមអនុវត្តឱ្យមានលទ្ធផលល្អប្រសើរ។ បង្កើនការល្បាត ផ្លាស់ប្តូរវេនប្រចាំការ តាមគោលដៅងាយរងគ្រោះ តាមមូលដ្ឋាន ភូមិ-ឃុំ-សង្កាត់ដែលខ្លួនទទួលខុសត្រូវ៕

អត្ថបទ៖ ឈាង មករា