សន្តិសុខសង្គម

ក្រុមក្មេងទំនើងដេញប្រយុទ្ធគ្នា ជ្រុលកាប់លើស្ត្រីម្នាក់ រងរបួសដៃឆ្វេង

បានផុស

១ ខែ មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

ក្មេងទំនើង ២ ក្រុម ប្រយុទ្ធគ្នា ជ្រុលកាប់លើស្ត្រីម្នាក់ដែលកំពុងបើកទ្វារបន្ទប់ចំម្រាមដៃបណ្ដាលឲ្យរងរបួស ត្រូវបងប្អូននាំទៅមន្ទីរពេទ្យ។

ហេតុការណ៍នេះបានកើតឡើងកាលពីវេលាម៉ោង ១០ និង ៥០ នាទីយប់ ថ្ងៃទី ២៤ ខែកុម្ភៈ ឆ្នាំ ២០២៥ ស្ថិតនៅភូមិចុងខ្សាច់ សង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីប្រជាពលរដ្ឋស្ថិតនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញមនុស្ស ២ ក្រុម ដេញកាប់គ្នា ដោយមួយក្រុមព្យាយាមរត់ និងមួយក្រុមទៀតដេញកាប់។ ក្នុងនោះដែរ ដោយឮសំឡេង ស្ត្រីរងគ្រោះដែលកំពុងនៅក្នុងបន្ទប់ជួលរបស់ខ្លួននោះបានបើកទ្វារមើល ក៏ស្រាប់តែឃើញក្មេងប្រុសម្នាក់ អាយុ ១ ខួប កំពុងតែស្រែកយំ។ ឃើញដូចនេះ ស្ត្រីរងគ្រោះក៏បានរត់ទៅបីក្មេងតូចនោះ ហើយរត់ចូលបន្ទប់វិញ ព្រោះខ្លាចត្រូវចំក្មេង។

អ្នកឃើញហេតុការណ៍បានបន្តថា ខណៈស្ត្រីរងគ្រោះទាញទ្វារបន្ទប់បិទ ក៏ស្រាប់តែត្រូវបុរសម្នាក់ក្នុងចំណោមក្រុមជនដៃដល់កាប់ចំទ្វារ បណ្តាលឲ្យធ្លុះត្រូវម្រាមដៃស្ត្រីរងគ្រោះ ដាច់ និងរងរបួសចេញឆ្អឹងតែម្ដង។ ប្រជាពលរដ្ឋនៅក្នុងភូមិឃើញដូចនេះ ក៏បាននាំគ្នាទាក់ទងទៅសមត្ថកិច្ច ដើម្បីចុះមកបង្ក្រាបក្រុមជនសង្ស័យខាងលើផងដែរ។