ផ្ទះចំនួន ០៨ខ្នង​ ត្រូវបានបំផ្លាញដោយសារខ្យល់កន្រ្តាក់ នៅស្រុកសំពៅលូន

កាលពីថ្ងៃទី១ ខែមីនា ឆ្នាំ២០២៥ វេលាម៉ោង ៥ និង ៣០នាទីល្ងាច ភ្លៀងធ្លាក់លាយឡំជាមួយខ្យល់បក់បោកខ្លាំង បណ្តាលឲ្យខូចខាតផ្ទះប្រជាពលរដ្ឋចំនួន ៨ខ្នង និងដំបូលសាលាឆាន់មួយកន្លែង ស្ថិតក្នុងភូមិអូរកណ្តោល ឃុំសន្តិភាព ស្រុកសំពៅលូន ខេត្តបាត់ដំបង។

យោងតាមសេចក្តីរាយការណ៍របស់សមត្ថកិច្ចមូលដ្ឋាន បានបញ្ជាក់ថា មុនពេលកើតហេតុ មានភ្លៀងធ្លាក់ខ្លាំង ខ្យល់កន្ត្រាក់ និងរន្ទះបានបោកបក់មកលើតំបន់នោះ បណ្តាលឲ្យខូចខាតយ៉ាងដំណំ។ ក្នុង​ចំណោម​ផ្ទះ​ទាំង​៨​ខ្នង​ដែល​រង​ការ​ប៉ះ​ពាល់ មាន​២​ខ្នង​ត្រូវ​បំផ្លាញ​ទាំង​ស្រុង។

ដោយឡែកនៅវត្តសែនឧត្តមសាមគ្គី ខ្យល់កន្រ្តាក់នេះបានបណ្តាលឱ្យរបើកស័ង្កសីសាលាឆាន់ ខូចខាតអស់ចំនួន ៦០ សន្លឹក តែមិនបណ្ដាលឲ្យគ្រោះថ្នាក់ដល់មនុស្សនិងសត្វឡើយ។ ឧបទ្ទវហេតុនេះគឺជាគ្រោះមហន្តរាយធម្មជាតិលើកដំបូងនៅក្នុងតំបន់នោះ បន្ទាប់ពីមានភ្លៀងធ្លាក់កក់ខែរួចមក ៕

អត្ថបទ៖ សោ និយមរ័ត្ន