ក្រុមឃាតកសម្លាប់នារីម្នាក់យកទៅកប់ជិតផ្សារ​អីអន៣ ត្រូវបានបញ្ជូនដល់តុលាការដើម្បីអនុវត្តច្បាប់

កម្លាំងនគរបាលនាយកដ្ឋាននគរបាលព្រហ្មទណ្ឌ នៅព្រឹកថ្ងៃទី៧ ខែមីនា ឆ្នាំ២០២៥នេះ បានបញ្ជូនខ្លួនក្រុមជនដៃដល់ជាជនជាតិចិនទៅសាលាដំបូងរាជធានីភ្នំពេញ ដើម្បីអនុវត្តតាមនីតិវីធីច្បាប់ ពាក់ព័ន្ធបទល្មើស ឃាតកម្ម សម្លាប់នារីខ្មែរម្នាក់រួចយកសពទៅកប់ទាំងអាក្រាតកាយក្បែរផ្សារទំនើបអ៊ីអន៣ ខណ្ឌដង្កោ។

ក្រុមជនដៃដល់ត្រូវបានកម្លាំងនគរបាលនៃនាយកដ្ឋាននគរបាលព្រហ្មទណ្ឌ សហការស្រាវជ្រាវចាប់ខ្លួនបានជាបន្តបន្ទាប់ ក្រោយពីសម្លាប់នារីជាសង្សារជាជនជាតិខ្មែរ ដោយសារនារីរងគ្រោះដឹងរឿងសម្ងាត់របស់ពួកគេ។ បើតតាមប្រភពព័ត៌មាន ក្រុមជនសង្ស័យ គឺជាសមាសភាពក្រុមឧក្រិដ្ឋជនចាប់ជម្រិតទារប្រាក់។

សូមរំលឹកថា កាលថ្ងៃទី១ ខែមីនា ឆ្នាំ២០២៥ សពនារីរងគ្រោះមានឈ្មោះ ហេង សៀវលី ភេទស្រី អាយុ១៨ឆ្នាំ មុខរបរបុគ្គលិកអនឡាញ ត្រូវបានកម្លាំងសមត្ថកិច្ចជំនាញរកឃើញ ដែលគេកប់ក្នុងដីទាំងអាក្រាតកាយក្នុងដីឡូត៍មួយកន្លែង ផ្លូវ៦០ម៉ែត្រ ភូមិស្រុកចេក សង្កាត់ជើងឯក ខណ្ឌដង្កោ រាជធានីភ្នំពេញ។

តាមរបាយការណ៍របស់នាយកដ្ឋាននគរបាលព្រណ្ឌទនណ្ឌ អគ្គស្នងការដ្ឋាននគរបាលជាតិ ក្រសួងមហាផ្ទៃ បានឲ្យដឹងថា ក្រុមជនដៃដល់មានបក្ខពួកសរុប៣នាក់ ត្រូវបានឃាត់ខ្លួនជាបន្តបន្ទាប់ ខណៈមេក្លោងត្រូវបានឃាត់ខ្លួនកាលពីថ្ងៃទី៥ ខែមីនា ឆ្នាំ២០២៥ នៅក្រុងបាវិត ខេត្តស្វាយរៀង៕

អត្ថបទ៖ រដ្ឋា