សន្តិសុខសង្គម

ឆេះផ្ទះ ១ ល្វែង ស្ទើរទាំងស្រុង និង ខូចខាតសម្ភារៈមួយចំនួន នៅបុរីសូនី

បានផុស

២៥ វិនាទី មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

អ៊ិន ពិសី

អគ្គិភ័យបានឆាបឆេះជាន់ទី ០១ នៃផ្ទះល្វែង របស់ប្រជាពលរដ្ឋ ដោយពុំទាន់ដឹងមូលហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង ១១ ព្រឹក ថ្ងៃទី ១៣ ខែមីនា ឆ្នាំ ២០២៥ ស្ថិតនៅចំណុចក្នុងបុរីសូនី តាមបណ្ដោយផ្លូវលេខ ៣៤ សង្កាត់ស្ទឹងមានជ័យទី ០៣ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានប្រាប់ឲ្យដឹងថា មុនកើតហេតុពួកគាត់បានឮសំឡេងផ្ទុះ ០២-០៣ ដង។ ពួកគាត់ក៏រត់ស្ទុះពីក្នុងផ្ទះមកមើល ភ្លាមៗ បានប្រទះឃើញបន្ទប់ជាន់ទី ០១ នៃផ្ទះល្វែង លាយឡំអណ្ដាតភ្លើងយ៉ាងសន្ធោសន្ធៅ និងផ្សែងហុយពេញផ្ទៃមេឃ ផ្អើលពលរដ្ឋនៅក្បែរនោះឆោឡោ។ ខណៈនោះ ប្រជាពលរដ្ឋបាននាំគ្នាយកទុយោទឹកបាញ់ពន្លត់ដែរ តែដោយសារចំហាយក្តៅខ្លាំងពេក ទើបប្រញាប់ប្រញាល់ទាក់ទងទៅកាន់សមត្ថកិច្ច ដើម្បីមកជួយអន្តរាគមន៍បាញ់ពន្លត់ កុំឲ្យមានការរាលដាល។

អគ្គិភ័យនេះបានបង្កឲ្យឆាបឆេះរងការខូចខាតបន្ទប់ជាន់ទី ០១ នៃផ្ទះល្វែង ស្ទើរទាំងស្រុង និងសម្ភារៈមួយចំនួន រួមទាំងប្រើប្រាស់រថយន្តការិយាល័យបង្ការ ពន្លត់អគ្គិភ័យ និង សង្គ្រោះ នៃស្នងការដ្ឋាននគរបាលរាជធានីភ្នំពេញអស់ចំនួន ០២ គ្រឿង , រថយន្តជំនួយរបស់ស្រាបៀរកម្ពុជាចំនួន ០១ គ្រឿង , រថយន្តកងរាជអាវុធហត្ថចំនួន ០៣ គ្រឿង ជួយអន្តរាគមន៍បាញ់ពន្លត់ឲ្យរលត់ជាស្ថាពរ ហើយចំពោះមូលហេតុសមត្ថកិច្ចកំពុងស្រាវជ្រាវ៕

អត្ថបទ ៖ រដ្ឋា