នគរបាលខេត្តសៀមរាប បន្តចុះឃាត់ម៉ូតូ និងរថយន្តដាក់ភ្លើងសញ្ញាខុសបច្ចេកទេស យកមកធ្វើកិច្ចសន្យាអប់រំ    

លោកឧត្តមសេនីយ៌ទោ ហួត សុធី ស្នងការនគរបាលខេត្តសៀមរាប បានឱ្យដឹងនៅថ្ងៃទី១៣ ខែមីនា ឆ្នាំ២០២៥ នេះថា កម្លាំងសមត្ថកិច្ចនគរបាលជំនាញបានបន្តចេញប្រតិបត្តិការ នៅតាមដងផ្លូវទាំងអស់ ធ្វើការឃាត់ម៉ូតូដែលមានដាក់ភ្លើងសញ្ញាខុសបច្ចេកទេស និងរថយន្តដាក់ភ្លើងសញ្ញាខុសបច្ចេកទេស យកមកដើម្បីធ្វើកិច្ចសន្យាអប់រំ និងរក្សាទុកនៅស្នងការដ្ឋាននគរបាលខេត្តជាបណ្តោះអាសន្នដើម្បីឱ្យរាងចាល។

លោកឧត្តមសេនីយ៍ទោហួត សុធី បានសំណូមពរប្រជាពលរដ្ឋ ដែលប្រើប្រាស់ម៉ូតូ សូមកុំបំពាក់ស៊ីម៉ាំងមានសំលេងលឺខ្លាំងខុសបច្ចេកទេស រឺក៏ដាក់ភ្លើងសញ្ញាខុសបច្ចេកទេស ដែលធ្វើឱ្យរំខានដល់សណ្តាប់ធ្នាប់សារធារណៈ។ បន្ថែមពីនេះលោកក៏បានសំណូមពរដល់ម្ចាស់អាជីវកម្មហាងលក់គ្រឿងបន្លាស់ គ្រឿងភ្លើង ម៉ូតូរថយន្ត សូមកុំលក់អ្វីដែរធ្វើឱ្យប៉ះពាល់ដល់សណ្តាប់ធ្នាប់សារធារណៈ ក្នុងនោះស្នងការខេត្ត និងមានផែនការចុះទៅណែនាំ រឺក៏អាចដកហូត នៅតាមបណ្តាហាងអាជីវកម្មដែលមានលក់គ្រឿងភ្លើងដែរនាំឱ្យខុសបច្ចេកទេស។

លោកស្នងការបន្ថែមថា ចំពោះម៉ូតូកែច្នៃចំនួន ៧គ្រឿង ដែលបានធ្វើការឃាត់ នៅថ្ងៃទី៩ ខែមីនា ឆ្នាំ២០២៥ ហើយមកដល់ថ្ងៃទី១២ ខែមីនា ឆ្នាំ២០២៥ បានប្រគល់ឱ្យម្ចាស់ម៉ូតូយកទៅប្រើប្រាស់វិញ បន្ទាប់ពីធ្វើការអប់រំ និងធ្វើកិច្ចសន្យា។

លោកបញ្ជាក់ថា ក្នុងនោះបានសមត្ថកិច្ចបានធ្វើការដោះដូរ សឺមុំាងលឺខ្លាំងចំនួន ២គ្រឿង ម៉ូតូអត់កញ្ចក់ចំនួន ៣គ្រឿង (ឱ្យបំពាក់កញ្ចក់ឡើងវិញ) ហើយម៉ូតូប្រើប្រាស់ភ្លើងឡាស៊ែ ចំនួន ៤គ្រឿង (ឱ្យដោះដូរ ) និងអំពូលខ្សែភ្លើងញាក់បានចំនួន ៧គ្រឿង រួមនឹងកន្ទុយម៉ូតូចំនួន ៣គ្រឿង ទៀតផងដែរ៕

ដោយ៖ជុន កុសល