ស្នងការរាជធានី បើកវគ្គបណ្តុះបណ្តាលបំ​ប៉នជំនាញ​​យុទ្ធសាស្រ្តបន្សាបព័ត៌មានក្លែងក្លាយ ដល់សិក្ខាកាមតាមបណ្ដាខណ្ឌទាំង១៤

លោកវរសេនីយ៍ឯក សំ វិច្ឆិកា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ក្រោមការណែនាំចង្អុលបង្ហាញពីឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ទោ យ៉ែម នៅ ស្នងការរងផែនការងារធនធានមនុស្ស នៅព្រឹកថ្ងៃទី២០ ខែមីនា ឆ្នាំ២០២៥នេះ បានធ្វើបទបង្ហាញវគ្គបណ្តុះបណ្តាលបំប៉នជំនាញ ស្តីពីយុទ្ធសាស្ត្របន្សាបព័ត៌មានក្លែងក្លាយ និងប្រយុទ្ធប្រឆាំងការឆ្លើយតបព័ត៌មានក្លែងក្លាយ ព័ត៌មានមិនពិត ដល់ក្រុមការងារព័ត៌មាន និងប្រតិកម្មរហ័ស តាមបណ្តាផែនការងារជំនាញ និងអធិការដ្ឋាននគរបាលខណ្ឌទាំង១៤ សរុបចំនួន៥០នាក់។

វគ្គបណ្តុះបណ្តាលនេះ សំដៅលើការពង្រីកចំណេះជំនាញក្នុងការគ្រប់គ្រង តាមដានឆ្លើយតប បកស្រាយដើម្បីបន្សាបព័ត៌មានក្លែងក្លាយ ព័ត៌មានមិនពិត នៅតាមបណ្តាញសង្គមឱ្យមានប្រសិទ្ធភាព កុំឱ្យប្រជាពលរដ្ឋមានការយល់ច្រឡំ ជាពិសេសការគ្រប់គ្រងសតិអារម្មណ៍របស់ប្រជាពលរដ្ឋក្នុងការទទួលបានព័ត៌មានពិត និងការសម្រេចចិត្តដ៏ត្រឹមត្រូវ ដើម្បី​ទប់ស្កាត់កុំឱ្យមានការជឿជាក់ខ្វះការពិចារណា ដែលអាចធ្វើការសម្រេចចិត្តខុសបង្កជះឥទ្ធិពលអាក្រក់ណាមួយនៅក្នុងសង្គម ឬនៅក្នុងជីវភាពប្រចាំថ្ងៃ នៅពេលដែលប្រជាពលរដ្ឋទទួលបានព័ត៌មានក្លែងក្លាយ ព័ត៌មានមិនពិត ពីការបង្កើតឡើងដោយក្រុមទុច្ចរិតណាមួយនោះ។

វគ្គបណ្តុះបណ្តាលបំប៉នជំនាញសិក្សាលើមេរៀន ១ ការយល់ដឹងពីព័ត៌មានក្លែងក្លាយ និងព័ត៌មានពិត ២ ភាពខុសគ្នារវាងព័ត៌មានក្លែងក្លាយ និងព័ត៌មានពិត ៣. យុទ្ធសាស្ត្របន្សាបព័ត៌មានក្លែងក្លាយ និងព័ត៌មានមិនពិត៕