Update៖ ករណីឆេះឃ្លាំងស្តុកសម្ភារៈនៅផ្លូវព្រះមុនីវង្ស កើតឡើងដោយសារជាងផ្សារដែក

ករណីអគ្គិភ័យឆេះឃ្លាំងស្តុកសម្ភារៈក្នុងការដ្ឋានសាងសង់អគារខុនដូនៅមហាវិថីព្រះមុនីវង្ស កែងផ្លូវលេខ៣៦០ កើតឡើងដោយសារជាងផ្សារដែក ហើយក៏ត្រូវបានគ្រប់គ្រងទរលត់ទៅវវិញជាស្ថាពរ។

ករណីអគ្គិភ័យនេះបានកើតឡើងកាលពីវេលាម៉ោង២និង៥៨នាទីរសៀលថ្ងៃទី២៤ ខែមីនា ឆ្នាំ២០២៥ នៅចំណុចខុនដូកំពុងសាងសង់មួយកន្លែង ស្ថិតនៅតាមបណ្តោយផ្លូវលេខ ៣៦០ កែងមហាវិថីមុន្នីវង្ស ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។

បើតាមប្រភពព័ត៍មានពីកន្លែងកើតហេតុអោយដឹងថា មុនពេលកើតហេតុក្រុមជាងនីមួយៗកំពុងធ្វើការតាមផ្នែករៀងៗខ្លួន ខណៈក្រុមជាងដែកកំពុងកាត់ និងផ្សារនៅជាន់ខាងលើ ចំណែកឯទីតាំងឆេះ គឺជាទីតាំងឃ្លាំងស្តុកគ្រឿងម៉ាស៊ីនត្រជាក់។ ពេលកំពុងធើ្វការក៏ស្រាប់តែមានផ្សែងហុយខ្មួរខ្មាញ់ចេញមកក្រៅលាយជាមួយអណ្ដាតភ្លើងឆាបឆេះយ៉ាងសន្ធោសន្ធៅ។ ភ្លាមៗក៏នាំគ្នារត់ទៅយកបំពង់ពន្លត់អគ្គិភ័យ មកបាញ់ពន្លត់ តែមិនអាចគ្រប់គ្រងបានដោយសារមានផ្សែងច្រើន លាយឡំអណ្តាតភ្លើងឆាបឆេះសន្ធោសន្ធៅទៅហើយ រួចក៏រាយការណ៍ជូនសមត្ថកិច្ចជំនាញអគ្គិភ័យ ដើម្បីមកជួយអន្តរាគមន៍អោយទាន់ពេលវេលាជៀសវាងបង្កការរាលដាល។

ចំពោះការឆាបឆេះនេះដែរបានបង្កការខូចខាត សម្ភារៈម៉ាសុីនត្រជាក់ដូចជា បំពង់ខ្យល់ និងគ្រឿងផ្សេងៗទៀត មួយចំនួន ក្នុងនោះបានប្រើប្រាស់រថយន្តបង្ការនិងពន្លត់អគ្គិភ័យ របស់ស្នងការដ្ឋាននគរបាលរាជធានីភ្នំពេញចំនួន៣គ្រឿង បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចស្រាវជ្រាវរកឃើញថា បណ្តាលមកពីជាងផ្សារដែកធ្លាក់កម្ទេចភ្លើង បង្កជាអគ្គិភ័យ៕

អត្ថបទ៖ រដ្ឋា