ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់

គិតមកដល់ថ្ងៃទី២៧ ខែមីនា ឆ្នាំ២០២៥នេះ មានរយៈជិត២០ថ្ងៃមកហើយ ករណីចោរចូលលួចកាបូបដល់ក្នុងផ្ទះពលរដ្ឋយកអស់មាសជាង៣តម្លឹង និងផ្លាកទីនមួយចំនួនសរុបជាទឹកប្រាក់អស់ប្រមាណជាង១ម៉ឺន២ពាន់ដុល្លារ នៅភូមិត្រពាំងត្រយឹង ឃុំចំបក់ ស្រុកបាទី ខេត្តតាកែវ ហាក់មិនមានតម្រុយពីក្រុមមុខសញ្ញានៅឡើយ ខណៈបទល្មើសចោរកម្មនៅតែបន្តកើតមានជាបន្តបន្ទាប់ និងញឹកញាប់ដដែល ហើយធ្វើសកម្មភាពទាំងថ្ងៃទៀតផង។ ករណីក្រុមមុខសញ្ញានៅមិនទាន់បង្ក្រាបបានបែបនេះ ធ្វើឲ្យប្រជាពលរដ្ឋនៅក្នុងមូលដ្ឋានស្រុកបាទី នៅតែព្រួយបារម្ភពីសុវត្ថិភាពក្នុងការរស់នៅប្រចាំថ្ងៃ។

តាមការលើកឡើងពីប្រជាពលរដ្ឋ ក្រោយកើតករណីលួចកាបូបអស់មាសជាង៣តម្លឹង ក្រុមជនសង្ស័យបានធ្វើសកម្មភាពគាស់ផ្ទះប្រជាពលរដ្ឋចំនួនពីរលើកបន្ថែមទៀត ដោយធ្វើសកម្មភាពនៅពេលថ្ងៃ យកអស់មាស១តម្លឹង ប្រាក់១ពាន់ដុល្លារ និងប្រាក់រៀល១លានរៀន ស្ថិតនៅក្នុងមូលដ្ឋានឃុំពារាម និងមួយករណីទៀតនៅឃុំចំបក់ដដែល។

លោក មាន វុត្ថា នាយប៉ុស្ដិ៍នគរបាលរដ្ឋបាលឃុំចំបក់ នៃអធិការដ្ឋាននគរបាលស្រុកបាទី បានឲ្យដឹងថា ករណីនេះកម្លាំងរបស់លោកបានសហការជាមួយកម្លាំងបណ្ដាប៉ុស្ដិ៍ផ្សេងៗ នៅតែបន្តស្រាវជ្រាវក្រុមមុខសញ្ញាដើម្បីឈានដល់ការឃាត់ខ្លួនក្រុមជនសង្ស័យយកមកផ្ដន្ទាទោសតាមផ្លូវច្បាប់។

លោកវរសេនីយ៍ឯក ឆាយ កែវមុន្នី អធិការនៃអធិការដ្ឋាននគរបាលស្រុកបាទី គិតមកដល់ថ្ងៃទី២៧មីនានេះ នៅមិនទាន់បញ្ជាក់អ្វីបន្ថែមនៅឡើយទេពាក់ព័ន្ធករណីចោរកម្មដែលកើតមានជាញឹកញាប់ក្នុងមូលដ្ឋានរបស់ខ្លួននេះ។

សូមបញ្ជាក់ថា ករណីចោរចូលយកកាបូបដល់ក្នុងផ្ទះប្រជាពលរដ្ឋអស់មាសជាង៣តម្លឹង និងផ្លាកទីនមួយចំនួននៅភូមិត្រពាំងត្រយឹង ឃុំចំបក់ ក្រោយកើតហេតុបានចំនួន១០ថ្ងៃ ពោលគឺនៅថ្ងៃទី១៨ ខែមីនា ឆ្នាំ២០២៥ ប្រជាពលរដ្ឋបានប្រទះឃើញកាបូបរបស់ជនរងគ្រោះដែលត្រូវបានក្រុមជនសង្ស័យយកមកប្លុងចោលនៅក្បែរផ្ទះកើតហេតុ ដោយបន្សល់ទុកតែអត្តសញ្ញាណប័ណ្ណ និងកាតចាក់វ៉ាក់សាំងរបស់ជនរងគ្រោះ ខណៈទ្រព្យសម្បតិ្តនៅក្នុងកាបូបបាត់ទាំងអស់៕

អត្ថបទ៖ សុខុម