សន្តិសុខសង្គម

ជនសង្ស័យ ២ នាក់ ឆក់កាបូបពីនារីម្នាក់បានសម្រេច នៅខណ្ឌសែនសុខ

បានផុស

១ ថ្ងៃ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

នារីម្នាក់ ខណៈជិះម៉ូតជាមួយបុរសជនជាតិស្បែកខ្មៅ ធ្វើដំណើរចេញពីម្តុំផ្សារដីហុយមកដល់គល់ស្ពានអាកាស ៧ មករា ស្ថិតក្នុងសង្កាត់ទឹកថ្លា ខណ្ឌសែនសុខ ក៏មានជនសង្ស័យ ២ នាក់ ជិះម៉ូតូ១ គ្រឿង មកក្បែរឆក់យកកាបូបបានសម្រេច គេចខ្លួនបាត់ស្រមោល បង្កឲ្យមានការភ្ញាក់ផ្អើលកាលពីវេលាម៉ោង ១០ និង ៣០ នាទី យប់ថ្ងៃទី ២៦ ខែមីនា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នារីរងគ្រោះឈ្មោះ អូ សុខណាត អាយុ ៣២ ឆ្នាំ មុខរបរបុគ្គលិកហាងបារាំង ស្នាក់នៅសង្កាត់ផ្សារកណ្ដាល ២ ខណ្ឌដូនពេញ រាជធានីភ្នំពេញ។

តាមប្រភពពីនារីរងគ្រោះ បញ្ជាក់ប្រាប់ថា ក្នុងកាបូបស្ពាយរបស់គាត់មានទូរសព្ទ ១ គ្រឿង អត្តសញ្ញាណប័ណ្ណ ១ និងកាតធនាគារចំនួន ២។

នារីរងគ្រោះបន្តថា នៅមុនពេលកើតហេតុគាត់ធ្វើដំណើរចេញពីម្តុំផ្សារដីហុយ ដោយបុរសជនជាតិស្បែកខ្មៅម្នាក់ ជាអ្នកឌុប ធ្វើដំណើរតាមបណ្ដោយផ្លូវសហព័ន្ធរុស្ស៊ី ទិសដៅពីលិចទៅកើត លុះបើកមកដល់ចំណុចកើតហេតុ ស្រាប់តែឃើញជនសង្ស័យ ២ នាក់ ជិះម៉ូតូ ១ គ្រឿង មិនចាំម៉ាក និងស្លាកលេខ មកក្បែរ បានឆក់កាបូបស្ពាយ ហើយជិះរត់គេច។ នៅពេលនោះដែរ មានប្រជាពលរដ្ឋនាំគ្នាដេញដែរ តែមិនទាន់ ជនសង្ស័យក៏ជិះរត់គេចខ្លួនបាត់ស្រមោលតែម្តង។

ក្រោយពេលកើតហេតុ ជនរងគ្រោះ នឹងទៅដាក់ពាក្យបណ្ដឹងដើម្បីឲ្យសមត្ថកិច្ចនគរបាលប៉ុស្តិ៍ ជួយរកជនសង្ស័យខាងលើចាត់ការតាមនីតិវិធីបន្ត៕

អត្ថបទ ៖ សំណាង