សន្តិសុខសង្គម

បញ្ជូនក្មេងទំនើង ០៥ នាក់ ទៅតុលាការខេត្តកណ្ដាល ករណីប្រើហិង្សា

បានផុស

១ ថ្ងៃ មុន

នៅ

ថ្ងៃព្រហស្បតិ៍ ២៧ មីនា ២០២៥

ដោយ

នៅព្រឹកថ្ងៃទី ២៧ ខែមីនា ឆ្នាំ ២០២៥ នេះ នគរបាលក្រុងតាខ្មៅ បានបញ្ជូនក្មេងទំនើងចំនួន ០២ ក្រុម ទៅកាន់តុលាការខេត្តកណ្ដាល ក្រោយធ្វើសកម្មភាពបើកឆាកប្រយុទ្ធគ្នា ដែលបង្កឲ្យមានការភ្ញាក់ផ្អើលយ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានឲ្យដឹងថា ដោយអនុវត្តតាមបទបញ្ជាដ៏ខ្ពង់ខ្ពស់ពី លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានបញ្ជាលោកធ្វើការដឹកនាំកម្លាំងស្រាវជ្រាវឃាត់ក្មេងទំនើងចំនួន ០៥ នាក់ កាលពីវេលាម៉ោង ៨ និង ៣០ នាទីព្រឹក ថ្ងៃទី ២៦ ខែមីនា ឆ្នាំ ២០២៥ នៅតាមបណ្ដោយផ្លូវបេតុង ខាងក្រោយពន្ធនាគារខេត្តកណ្តាល ក្នុងភូមិក្រពើហារ សង្កាត់ព្រែកឫស្សី ក្រុងតាខ្មៅ ខេត្តកណ្តាល។ ក្នុងនោះ សមត្ថកិច្ចដកហូតបានម៉ូតូចំនួន ០២ គ្រឿង ដោយម៉ូតូទី ០១ ម៉ាក Honda Scoopy ពណ៌ស ស្លាកលេខភ្នំពេញ 1JT0043 , ម៉ូតូទី ០២ ម៉ាក Suzuki Nex ពណ៌ឈាមជ្រូក ស្លាកលេខភ្នំពេញ 1 KY2360 និង មួកការពារសុវត្ថិភាពចំនួន ០៤។

បច្ចុប្បន្ន ជនសង្ស័យទាំង ០៥ នាក់ និង វត្ថុតាង ត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅតុលាការចាត់ការតាមនីតិវិធី។

គួរបញ្ជាក់ថា កន្លងមក ក្មេងទំនើងទាំង ០២ ក្រុមនេះ តែងតែមានទំនាស់ផ្លែផ្កាឌឺដងដាក់គ្នាតាម(បណ្ដាញសង្គម Tik Tok) និង ធ្លាប់ដេញវាយគ្នាទៅវិញទៅមកជាច្រើនដងមកហើយ។ លុះមកដល់ថ្ងៃទី ២៦ ខែមីនា ឆ្នាំ ២០២៥ វេលាម៉ោង ៨ និង ៣០ នាទីព្រឹក ស្រាប់តែក្រុមក្មេងទំនើងទាំង ០២ ក្រុមនេះ បានជិះម៉ូតូជួបគ្នាចៃដន្យតាមផ្លូវ ដោយភាគីម្ខាងជិះម៉ូតូឌុបគ្នា ០២ នាក់ និង ភាគីម្ខាងទៀតជិះឌុបគ្នា ០៣ នាក់ មកដល់ចំណុចកើតហេតុខាងលើ ក៏បានឈ្លោះប្រកែកគ្នា ហើយយកមួកសុវត្ថិភាពដែលពាក់ជាប់នៅក្បាលដោះមកបើកឆាកប្រយុទ្ធគ្នាទៅវិញទៅមក បង្កឲ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋរាយការណ៍ជូនសមត្ថកិច្ចភ្លាមៗ ដើម្បីធ្វើអន្តរាគមន៍ចាប់ក្មេងទំនើងទាំងនោះ៕

អត្ថបទ ៖ រដ្ឋា