ជនសង្ស័យប្លន់រថយន្តលើផ្លូវល្បឿនលឿន ត្រូវសមត្ថកិច្ចស្រុកអង្គស្នួលឃាត់ខ្លួនបានហើយ

កម្លាំង​សមត្ថកិច្ច​ស្រុក​អង្គស្នួល ខេត្ត​កណ្តាល អះអាង​ថា ជនសង្ស័យ​ប្លន់​រថយន្ត​លើ​ផ្លូវ​ល្បឿន​លឿន នា​ព្រឹក​ថ្ងៃ​ទី ២៩ ខែ​មីនា ឆ្នាំ ២០២៥ នេះ ឃាត់ខ្លួន​បាន​ហើយ ចំណែក​បក្ខពួកម្នាក់ទៀត កំពុង​រត់​គេច​ខ្លួន​។

សមត្ថកិច្ច បាន​បញ្ជាក់​ថា ជនសង្ស័យ​ពេល​ប្លន់​រថយន្ត​ពី​ផ្លូវ​ល្បឿន​លឿន​ហើយ​នោះ បាន​យក​ទៅ​ប្លុង​ចោល​នៅ​ខណ្ឌ​កំបូល បន្ទាប់មក​ធ្វើ​សកម្មភាព​ប្លន់​រថយន្ត ១ គ្រឿង​ទៀត ហើយ​ជិះ​គេចខ្លួន។

សមត្ថកិច្ច បន្ថែម​ថា ពេល​ជនសង្ស័យ​ជិះ​ដល់​ខណ្ឌ​ព្រែក​ព្នៅ ក៏​ត្រូវ​សមត្ថកិច្ច​ឃាត់ខ្លួន​បាន ហើយ​ប្រគល់​ខ្លួន​ជូន​សមត្ថកិច្ច​នៅ​ស្រុក​អង្គស្នួល ខេត្ត​កណ្ដាល។

សូមបញ្ជាក់ថា ករណី​ខាងលើនេះ​ផ្ដើម​ចេញ​ពី​ករណី​ឆក់ ដែល​បង្ក​ដោយ​ជនល្មើស ២ នាក់ ហើយ​ពេល​នគរបាល​ដេញ​ចាប់ ជនសង្ស័យ​ បាន​រត់​ទៅ​ភ្ជង់​ឡាន​ជនរងគ្រោះ​ទី ១ ដែល​កំពុង​ធ្វើ​ដំណើរ​តាម​ផ្លូវ រួច​យក​រថយន្ត​នេះ ទៅ​ប្លុង​ចោល ហើយ​ទៅ​ភ្ជង់​ឡាន​ទី ២ របស់​អ្នក​ដំណើរ រហូត​ឡើង​ផ្លូវ​ល្បឿន​លឿន បើក​គេច តែ​ចុង​ក្រោយ ត្រូវ​នគរបាល​តាម​ចាប់​បាន​ម្នាក់ ចំណែក​ម្នាក់​ទៀត​កំពុង​គេច​ខ្លួន៕

អត្ថបទ ៖ រដ្ឋា