វរការពារព្រំដែនគោកលេខ ៨២៣ បន្តដាក់កម្លាំងល្បាតតាមខ្សែបន្ទាត់ព្រំដែនដើម្បីការពារបទល្មើសឆ្លងដែនខុសច្បាប់

ប៉ុន្មានខែចុងក្រោយនេះ កិច្ចប្រតិបត្តិការល្បាតតាមព្រំដែនរបស់កម្លាំងវរសេនាតូចនគរបាលការពារព្រំដែនគោកលេខ ៨២៣ ដែលឈរជើងទិសសំឡូតបានធ្វើការពង្រឹងតាមខ្សែបន្ទាត់ព្រំដែនកម្ពុជា-ថៃ ដើម្បីការពារបទល្មើសឆ្លងដែនខុសច្បាប់គ្រប់ប្រភេទ។

ដោយគោរពតាមបទបញ្ជាយ៉ាងម៉ឺងម៉ាត់របស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង ដែលបានបញ្ជាឲ្យកម្លាំងក្រោមឱវាទទាំងអស់បង្កើននូវការប្រុងប្រយ័ត្ន ពិសេសគឺនៅតាមខ្សែក្រវ៉ាត់បន្ទាត់ព្រំដែន កម្ពុជា-ថៃ ដើម្បីទប់ស្កាត់ឲ្យបានរាល់បទល្មើសឆ្លងដែនគ្រប់ប្រភេទ ឲ្យបាននូវសុខសន្តិភាព ជូនប្រជាពលរដ្ឋ ទើបលោក វរសេនីយ៍ឯក សូត្រ សំអុល មេបញ្ជាការវរសេនាតូច នគរបាលការពារព្រំដែនគោកលេខ ៨២៣ ប្រចាំទិសសំឡូត បានបញ្ជាទៅកម្លាំងក្រោមឱវាទ និងបែងចែកកម្លាំងធ្វើការយាមកាមនិងល្បាត ទាំងយប់ទាំងថ្ងៃតាមបណ្ដោយខ្សែបន្ទាត់ដែលខ្លួនគ្រប់គ្រង។

លោកមេបញ្ជាការបានលើកឡើងថា ភូមិសាស្ត្ររបស់ស្រុកសំឡូតមានភាពទូលំទូលាយ ដោយលោកត្រូវបែងចែកកម្លាំងយ៉ាងច្បាស់លាស់ក្នុងការការពារបូរណភាពទឹកដី បើទោះបីជាថ្មីៗនេះមានការរង្គោះរង្គើនៅតំបន់ប្រាសាទតាមាន់ធំ បន្តិចបន្តួចក្ដី។

លោកវរសេនីយ៍ឯក សូត្រ សំអុល បានសង្កត់ធ្ងន់ថា ភូមិសាស្ត្រដែលកម្លាំងរបស់លោកគ្រប់គ្រង គឺចាប់តាំងពីខ្សែបន្ទាត់ព្រំដែនជាប់ខេត្តពោធិ៍សាត់ ខេត្តប៉ៃលិន និងជាប់ប្រទេសថៃ ដោយភូមិសាស្រ្តខ្លះមានសភាពស្មុគស្មាញ ប៉ុន្តែទោះបីជាយ៉ាងណាក៏ដោយក៏ការពង្រឹងកម្លាំង ដើម្បីការពារសុខសុវត្ថិភាពជូនប្រជាពលរដ្ឋ ធ្វើយ៉ាងណាឲ្យប្រទេសមានសុខសន្តិភាព តាមនយោបាយឈ្នះឈ្នះ របស់សម្ដេច ហ៊ុន សែន ប្រធានព្រឹទ្ធសភា ដែលសម្ដេចបានត្រួសត្រាយផ្លូវតាំងពីសម័យសង្គ្រាម រហូតដល់បច្ចុប្បន្នដែលធ្វើឲ្យប្រជាពលរដ្ឋមានសុខសន្តិភាពដូចសព្វថ្ងៃនេះ៕

អត្ថបទ៖ សោ និយមរ័ត្ន