អ្នកចាត់ការក្រុមកម្ពុជា Keisuke Honda បន្តបង្ហាញ ខ្លួនបាន២ប្រកួត នៅលីគ ប្រទេស អាហ្សេបៃហ្សង់

លោក Keisuke Honda អ្នកចាត់ការទូទៅរបស់ក្រុមបាល់ទាត់ជម្រើសជាតិកម្ពុជាបានបង្ហាញខ្លួនជាលើកទី២ហើយ គិតត្រឹមសប្ដាហ៍ទី២២ នៃពានរង្វាន់ លីគ កំពូលប្រទេស អាហ្សេបៃហ្សង់ (Azerbaijan Premier League) នៅយប់ ថ្ងៃ សៅរ៍ ទី១០ ខែមេសា ឆ្នាំ២០២១ ចុងសប្ដាហ៍នេះ តែលទ្ធផលបញ្ចប់ទៅបានត្រឹមស្មើ គ្នា។

ក្លឹបបាល់ទាត់ Neftçi Baku របស់ Honda បានប្រកួតស្មើគ្នាជាមួយក្រុម Gabala ដោយលទ្ធផល២ទល់២ លើទីលាន កីឡដ្ឋាន Gabala City Stadium។

លោក Yunis Huseynov អ្នកចាត់ការទូទៅ ក្រុមថ្មីរបស់Honda បានសម្រេចចិត្តដាក់កីឡាកររូបនេះឱ្យបង្ហាញខ្លួន ពេញ ៩០នាទី តែម្តង ស្របពេលប្រកួតដំបូងបានដាក់ឱ្យនៅកៅអីបម្រុងនិងប្តូរចូលនៅនាទី៤៦។

គិតត្រឹមពេលនេះក្រុមបាល់ទាត់ Neftçi Baku កំពុងឈរកំពូលតារាងបណ្តោះអាសន្ន ដោយស្មើពិន្ទុគ្នាជាមួយក្រុម គូ ប្រជែង Qarabağ ដែលមាន ៤៣ពិន្ទុ ប៉ុន្តែក្រុមQarabağ នៅសល់១ប្រកួតក្នុងដៃទៀត។

កីឡាករ Namik Alaskarov មិត្តរួមក្រុម របស់ Honda ឈរ កំពូលតារាងក្នុងបញ្ជី Top Scores ក្រោយរកបាន ១៤គ្រាប់ ច្រើនជាង គេ។

Honda បុរសវ័យ៣៤ឆ្នាំ នៅមានបេសកម្មជាច្រើនជាមួយក្រុមជម្រើសជាតិកម្ពុជា នៅឆ្នាំ២០២១ នេះទាំងក្នុងវគ្គជម្រុះពានរង្វាន់ 2022 FIFA World Cup ជុំទី២ប្រចាំទ្វីបអាស៊ី ប្រកួតក្នុងវគ្គជម្រុះ ជើងឯក ទ្វីបអាស៊ី ប្រកួតកីឡាស៊ីហ្គេមឆ្នាំ២០២១ នៅវៀតណាម និងប្រកួតពានរង្វាន់ ជើងឯក តំបន់ អាស៊ាន AFF Suzuki Cup 2020 ជាដើម។

រូបគេបានចូលនិវត្តន៍ពីបាល់ទាត់ជម្រើសជាតិជប៉ុន ក្រោយចប់បេសកម្មក្នុងពានរង្វាន់ 2018 FIFA World Cup នៅប្រទេសរុស្ស៊ីពេលក្រុមជម្រើសជាតិជប៉ុនធ្លាក់នៅវគ្គ១៦ក្រុមចុងក្រោយ។ យ៉ាងណាក្តីអាជីពជាកីឡាកររបស់រូបគេមិនទាន់បញ្ចប់នោះទេ។

ចំណែកក្រុមថ្មីរបស់ Honda មានអាយុកាល៨៣ឆ្នាំ នឹងជាក្រុមឈ្នះជើងឯកពានរង្វាន់លីគកំពូល អាហ្សេបៃហ្សង់ ចំនួន៨លើក ឈ្នះពានរង្វាន់ Azerbaijan Cup ចំនួន៧លើក ឈ្នះពាន Azerbaijan Supercup ចំនួន២លើក និងធ្លាប់ឡើងទៅលេងក្នុងពានរង្វាន់ UEFA Champion League ផងដែរ។

ក្រុមនេះ ប្រើប្រាស់កីឡដ្ឋាន Bakcell Arena ក្នុងទីក្រុងបាគូ ខណៈ បច្ចុប្បន្នកំពុងឈរចំណាត់ថ្នាក់លេខ ២ ក្នុងតារាង រួម ហើយគូប្រជែង Qarabağ ឈរកំពូលតារាងបណ្តោះអាសន្ន ក្រោយ ប្រកួត បាន ២០ សប្ដាហ៍មកនេះ៕

អត្ថបទ៖ម៉េង ហួរ