កីឡា

តាមពិត Messi លេងវគ្គផ្តាច់ព្រ័ត្រ Copa America ទាំងមានរបួស

បានផុស

៣ years មុន

នៅ

ថ្ងៃអាទិត្យ ១១ កក្កដា ២០២១

ដោយ

គ្រូបង្វឹកក្រុមបាល់ទាត់ជម្រើសជាតិអាហ្សង់ទីនលោក Lionel Scaloni នៅថ្ងៃអាទិត្យនេះបានសរសើរដល់ Lionel Messi ដោយបង្ហើបថា ខ្សែប្រយុទ្ធរូបនេះលេងវគ្គផ្ដាច់ព្រ័ត្រ Copa America ឈ្នះប្រេស៊ីល ទាំងរបួស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីទទួលបានជ័យជម្នះ ១-០ នៅឯកីឡដ្ឋាន Maracana ក្នុងទីក្រុង Rio de Janeiro ប្រទេសប្រេស៊ីល លោក Scaloni បានប្រាប់អ្នកសារព័ត៌មានថា “ប្រសិនបើអ្នកដឹងពីរបៀបដែល Messi លេងនៅ Copa America អ្នកនឹងស្រឡាញ់គាត់កាន់តែខ្លាំង” ។

លោក Scaloni មិនបាននិយាយថា Messi របួសអ្វីនោះទេ ប៉ុន្តែគាត់បានបង្ហាញការកោតសរសើរដល់ Messi នៅរាត្រីមួយដែលអាហ្សង់ទីនបានធ្វើដំណើរក្នុងផ្លូវលំបាកជាច្រើន ដើម្បីអបអរសាទរពានរង្វាន់អន្តរជាតិលើកដំបូងរបស់ពួកគេក្នុងរយៈពេល ២៨ ឆ្នាំ និងជាជ័យជម្នះលើកដំបូងរបស់ Messi ជាមួយក្រុមជម្រើសជាតិ ។

Messi ដែលឈ្នះពានរង្វាន់កីឡាករឆ្នើមប្រចាំឆ្នាំរបស់ FIFA ចំនួន ៦ ដងនោះ បានឈ្នះពានរង្វាន់ និងពានកិត្តិយសស្ទើរតែគ្រប់គ្រឿងហើយ ជាមួយក្លឹបអ្នកមានបុណ្យ Barcelona ប៉ុន្តែចំពោះក្រុមជម្រើសជាតិអាហ្សង់ទីនវិញ រូបគេបានបរាជ័យផ្ទួនៗ ពោលឡើងវគ្គផ្ដាច់ព្រ័ត្រ ៤ លើកបានត្រឹមតែរងជើងឯក ។

គួរបញ្ជាក់ថា កីឡាករវ័យ ៣៤ ឆ្នាំរូបនេះ ធ្លាប់បានប្រកាសចូលនិវត្តន៍ម្ដងរួចមកហើយ បន្ទាប់ពីចាញ់ ឈីលី ក្នុងវគ្គផ្ដាច់ព្រ័ត្រ Copa America ឆ្នាំ ២០១៦ ប៉ុន្តែ Messi បានសម្រេចចិត្តត្រឡប់មកជួយក្រុមជម្រើសជាតិអាហ្សង់ទីនវិញ នៅប៉ុន្មានសប្តាហ៍ក្រោយមក ៕