អបអរសាទរ! ប្រេស៊ីល ឈ្នះមេដាយមាសអូឡាំពិកបាល់ទាត់ផ្នែកបុរសលើកទី ២ ជាប់ៗគ្នា

ប្រេស៊ីល បានឈ្នះមេដាយមាសអូឡាំពិកលើប្រភេទវិញ្ញាសាបាល់ទាត់ផ្នែកបុរសជាលើកទី ២ ជាប់ៗគ្នារបស់ពួកគេ ក្រោយទទួលបានជ័យជម្នះ ២-១ លើប្រទេសអេស្ប៉ាញនៅម៉ោងបន្ថែមក្នុង ។

ខ្សែប្រយុទ្ធ Matheus Cunha ជាអ្នករកគ្រាប់នាំមុខឲ្យប្រេស៊ីល នៅនាទីចុងក្រោយក្នុងតង់ទី ១ នៃវគ្គផ្តាច់ព្រ័ត្រកាលពីថ្ងៃសៅរ៍ បន្ទាប់ពីខ្សែប្រយុទ្ធរបស់ក្លឹបទូកក្ដោង Everton កីឡាករ Richarlison មានឱកាសទទួលបានបាល់ប៉េណាល់ទី តែស៊ុតមិនចូល ។

ប៉ុន្តែនៅនាទីទី ៦១ នៃតង់ទី ២ ខ្សែប្រយុទ្ធសញ្ជាតិអេស្ប៉ាញ Mikel Oyarzabal រកគ្រាប់បាល់តាមស្មើវិញ ក្រោយការបញ្ជូនបាល់ពីសំណាក់ខ្សែបម្រើ Carlos Soler ។

ពេញ ៩០ នាទីការប្រកួតនៅទីក្រុង Yokohama បានបញ្ចប់ដោយលទ្ធផល ១-១ ហើយការប្រកួតបានឈានដល់ម៉ោងបន្ថែម ១៥ នាទីពីរដង ។ Malcom ជាអ្នកបញ្ចប់ក្ដីស្រមៃរបស់អេស្ប៉ាញ ដោយបានស៊ុតបញ្ចូលទីឲ្យប្រេស៊ីលទទួលបានមេដាយមាស នៅនាទី ១០៨ ។

គួរបញ្ជាក់ថា ប្រេស៊ីល បានរក្សាមេដាយមាសអូឡាំពិកលើប្រភេទវិញ្ញាសាបាល់ទាត់ផ្នែកបុរសជាលើកទី ២ ជាប់ៗគ្នា ក្រោយទទួលបានមេដាយមួយនេះកាលពីឆ្នាំ ២០១៦ ដែលប្រេស៊ីលធ្វើជាម្ចាស់ផ្ទះខ្លួនឯង ហើយវាក៏ជាមេដាយមាសលើកទី ៥ ផងដែរសម្រាប់ក្រុមបាល់ទាត់ប្រេស៊ីលក្នុងព្រឹត្តិការណ៍កីឡាអូឡាំពិក ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera