រង់ចាំរាប់ខែ ស្រាប់តែជិតដល់ថ្ងៃប្រកួត Errol Spence ប្រកាសដកខ្លួន មិនវាយជាមួយ Pacquiao វិញ 

ម្ចាស់ជើងឯកប្រដាល់សកលទម្ងន់ Welterweight កីឡាករ Errol Spence Jr បានដកខ្លួនចេញពីការប្រកួតនាពេលខាងមុខ ជាមួយអតីតម្ចាស់ខ្សែក្រវាត់ទម្ងន់ Welterweight កីឡាករ Manny Pacquiao ដោយសាររបួសភ្នែកខាងឆ្វេង ហើយម្ចាស់ខ្សែក្រវាត់ WBA Welterweight កីឡាករ Yordenis Ugás នឹងត្រូវចូលខ្លួនជំនួស Spence។

Spence និង Pacquiao គ្រោងនឹងប្រកួតនៅថ្ងៃទី ២១ ខែសីហានេះ ក្នុងទីក្រុង ឡាសវេហ្គាស។

Spence បាននិយាយថា “ខ្ញុំពិតជារំភើបណាស់ ចំពោះការប្រកួតនិងព្រឹត្តិការណ៍នេះ ក៏ប៉ុន្តែ ក្រុមគ្រូពេទ្យបានរកឃើញរបួស នៅភ្នែកខាងឆ្វេងរបស់ខ្ញុំហើយនិយាយថា ខ្ញុំត្រូវការវះកាត់ឲ្យបានលឿនបំផុត និងគ្មានវិធីណាដែលខ្ញុំអាចប្រយុទ្ធទាំងភ្នែករបស់ខ្ញុំ ស្ថិតក្នុងស្ថានភាពបែបនេះបាននោះទេ”។

ដៃគូថ្មីរបស់ Pacquiao គឺកីឡាករ Ugás មានកំណត់ត្រាប្រកួតក្នុងអាជីព៣០ដង ឈ្នះ២៦ដង ចាញ់៤ដង ដោយផ្តួលដៃគូឲ្យបោះបង់ការប្រកួតចំនួន ១២ដង។

កីឡាកររូបនេះ បានឈ្នះការប្រកួត៣លើកចុងក្រោយ ហើយការចាញ់ចុងក្រោយបំផុតរបស់ខ្លួនគឺនៅខែមីនាឆ្នាំ ២០១៩ ជាមួយកីឡាករ Shawn Porter។ Ugás បានយកឈ្នះកីឡាករ Abel Ramos កាលពីខែកញ្ញាឆ្នាំមុន ក្លាយជាម្ចាស់ខ្សែក្រវាត់ WBA Welterweight៕

ប្រែសម្រួល៖ Vann Vann

ប្រភព៖ The Athletic

ចុចអាន៖ Pacquiao​ បង្ហើប​ពេល​វេលា​ពី​ការ​សម្រេច​ចិត្ត​ឈរឈ្មោះ​ប្រធានាធិបតី​ហើយ