​សហព័ន្ធកីឡាចំបាប់ធ្វើតេស្តជ្រើសរើសក្រុម ជម្រើសជាតិឆ្ពោះទៅស៊ីហ្គេម ២០២៣

សហព័ន្ធកីឡាចំបាប់កម្ពុជា កាលពីម្សិលមិញ បានធ្វើតេស្តកីឡាករ កីឡាការិនី ដើម្បីជ្រើសរើសចូល​ក្រុម​ជម្រើសជាតិដើម្បីហ្វឹកហាត់ត្រៀមចូលរួមការប្រកួតកីឡាស៊ីហ្គេម២០២៣។

លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា បញ្ជាក់ថា នេះជាការធ្វើតេស្តជ្រើស​រើសក្រុម​ជម្រើសជាតិឆ្ពោះទៅស៊ីហ្គេម ២០២៣ ដែលតាមគោលការណ៍របស់មជ្ឈមណ្ឌ​លជាតិ ហ្វឹកហ្វឺនកីឡា ​នៃ​ក្រសួងអប់រំ យុវជន និង កីឡា ដោយចាប់ពីឆ្នាំ២០២១តទៅ មិនមានបែង​ចែកក្រុមឈុតធំ និងថ្នាលទេ គឺ​ក្រុមជម្រើសជាតិ សម្រាប់ស៊ីហ្គេម​​២០២៣ ។ ដូច្នេះកីឡាករ កីឡា ការិនីជម្រើសជាតិ កីឡាចំបាប់ ដែល​មានចំនួន ៣០នាក់​ មិនអាចនៅទាំងអស់គ្នា​ដល់ឆ្នាំ ២០២៣ទេ ដែលយើងត្រូវការ​ជ្រើសរើស​កីឡាករ កីឡាការិនី ដែលមាន​ទេពកោសល្យ និង​សក្ដានុពល ដើម្បី​ហ្វឹកហាត់​ត្រៀមឲ្យស៊ីហ្គេម២០២៣។

លោក​បញ្ជាក់​ថា ការកំណត់បែបនេះមិនមែនត្រឹមតែទៅលើប្រភេទកីឡាចំបាប់មួយទេ ពោលគឺប្រភេទ​កីឡា​ទាំងអស់របស់កម្ពុជា ត្រូវមានក្រុមជម្រើសរបស់ខ្លួន សម្រាប់​ឆ្ពោះទៅស៊ីហ្គេម ២០២៣ ដូចៗគ្នា៕

អត្ថបទ ៖ វិសិទ្ធ