កីឡា

សហព័ន្ធកីឡារាំកម្ពុជា បន្តគាំទ្រលោកស្រី ញ៉ែម មរកត បន្តតំណែងជាប្រធានអាណត្តិថ្មីទៀត

បានផុស

៣ years មុន

នៅ

ថ្ងៃព្រហស្បតិ៍ ១៤ តុលា ២០២១

ដោយ

សហព័ន្ធកីឡារាំកម្ពុជាបានធ្វើមហាសន្និបាតបញ្ចប់អាណត្តិទី៣ឆ្នាំ២០១៧-ឆ្នាំ២០២១ និងបោះឆ្នោតជ្រើសរើសសមាជិកប្រតិបត្តិអាណត្តថ្មីឆ្នាំ២០២១ ដល់ឆ្នាំ២០២៥ នៅព្រឹកថ្ងៃទី១៤ ខែ តុលា ឆ្នាំ២០២១ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ញ៉ែម មរកត ប្រធានសហព័ន្ធកីឡារាំកម្ពុជាអាណត្តិចាស់ បានទទួលការគាំទ្រជាប្រធានសហព័ន្ធអាណត្តិថ្មីបន្តទៀត ដោយមានអនុប្រធានចំនួន៣រូប គឺលោក វ៉ាត់ ចំរើន លោក ស្រី ម៉ក់ វណ្ណស៊ីថា និងលោកឧកញ៉ា ប៉ិច បូឡែន។ ចំពោះលោកស្រី ហង់ ស៊ីមន ជាអគ្គលេខាធិការ លោកស្រី ស្រី ស៊ីវឡេង អគ្គលេខាធិការង និងលោកស្រី សោ ម៉ាល័យ ជាអគ្គហេរញ្ញឹក និងសមាជិកប្រតិបត្តិ ៦រូបទៀត។

ជាមួយនឹងការបានទទួលការគាំទ្រជាប្រធានសហព័ន្ធកីឡារាំកម្ពុជាអាណត្តិថ្មី លោកស្រី ញ៉ែម មរកត បានវាយតម្លៃខ្ពស់ចំពោះកិច្ចខិតខំប្រឹង ប្រែងអភិវឌ្ឍធនធានកីឡាករ កីឡាការិនីរហូត ដល់ចូលរួមប្រកួតប្រជែងមេដាយបានជាបន្ត បន្ទាប់លើឆាកអន្តរជាតិ។លោកស្រីមានប្រសាសន៍ថា «ខ្ញុំពិតជាមានមោទនភាពណាស់ ដែលយើងទាំងអស់គ្នាបានប្រឹង ប្រែងអភិវឌ្ឍវិស័យកីឡារាំ ឲ្យទទួលបានការគាំទ្រ នាពេលនេះ។ យើងមិនមានធនធានច្រើនទេ ហើយក៏មិនមានប្រាក់ខែដែរ ប៉ុន្តែយើងទាំងអស់ស្ម័គ្រចិត្តធ្វើការដោយឆន្ទៈខ្ពស់ និងអស់ពីបេះដូង ហើយព្រមទាំងចំណាយធនធានផ្ទាល់ខ្លួន ដើម្បីជួយជ្រោមជ្រែងដល់ដំណើរការអភិវឌ្ឍបន្ថែមទៀត»។

ជាមួយគ្នានោះ លោកស្រីក៏សម្តែងនូវអំណរគុណដ៏ជ្រាលជ្រៅជូនចំពោះលោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា លោកបណ្ឌិត ថោង ខុន ប្រធាន NOCC ក៏ដូចជាថ្នាក់ដឹកនាំ CAMSOC ដែលផ្តល់ការគាំទ្រជានិច្ចចំពោះសហព័ន្ធរាំកម្ពុជា បន្តដំណើរការឆ្ពោះទៅចូលរួមប្រកួតប្រជែងលើឆាក អន្តរជាតិ ជាពិសេសគឺគោលដៅដ៏ធំនៃការរៀបចំទទួលធ្វើម្ចាស់ផ្ទះស៊ីហ្គេម លើកទី៣២ ឆ្នាំ ២០២៣ នៅកម្ពុជាជាប្រវត្តិសាស្ត្រជាលើកដំបូងផងដែរ។

លោកស្រី ហង់ ស៊ីមន អគ្គលេខាធិការ បានគូសបញ្ជាក់ថា ក្រោមការគាំទ្រពីក្រសួងអប់រំយុវជន និងកីឡា គណៈកម្មាធិការជាតិអូឡាំពិកកម្ពុជា ក៏ដូចជាគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ឆ្នាំ ២០២៣(CAMSOC)សហព័ន្ធកំពុងខិតខំបំពេញតួនាទីភារកិច្ចរបស់ខ្លួនយ៉ាងសកម្ម ដើម្បីគោលដៅពង្រឹង ពង្រីក និងអភិវឌ្ឍវិស័យកីឡារាំកម្ពុជាឲ្យកាន់តែផុសផុល និងរឹងមាំ ក្នុងគុណ ភាពបច្ចេកទេស ឈានឆ្ពោះទៅរកមេដាយមាសជូនជាតិ ក្នុងឱកាសដែលកម្ពុជាទទួលធ្វើម្ចាស់ ផ្ទះ ស៊ីហ្គេម លើកទី៣២ ឆ្នាំ២០២៣ និងស៊ីហ្គេម នាពេលខាងមុខជាបន្តបន្ទាប់ទៀត។

ចាប់តាំងពីការបង្កើតសហព័ន្ធកីឡារាំកម្ពុជា កាលពីឆ្នាំ២០០៩ ក្រៅពីទទួលបានការគាំទ្រនៅ ក្នុងស្រុក សហព័ន្ធក៏ត្រូវបានទទួលស្គាល់ជាអន្តរ ជាតិពីសហព័ន្ធកីឡារាំពិភពលោក(WDSF) និងសហព័ន្ធរាំអាស៊ីផងដែរ។ សូមបញ្ជាក់ថា មកទល់ពេលនេះសហព័ន្ធកីឡារាំកម្ពុជា បានជំរុញឲ្យមានការបង្កើតក្លឹបបានចំនួន៥ ដោយមានកីឡាករ កីឡាការិនីប្រមាណ៥០នាក់ ខណៈសហព័ន្ធមានចៅក្រមថ្នាក់ជាតិ៤ នាក់ និងអន្តរជាតិម្នាក់៕

អត្ថបទ៖ វិសិទ្ធ

Related Topics:កីឡារាំ