កីឡា

ដល់ថ្ងៃហើយ! U23 កម្ពុជាប៉ះហុងកុងរកឱកាសទៅជុំផ្តាច់ព្រ័ត្រ AFC U23 Asian Cup លើកដំបូង

បានផុស

៣ years មុន

នៅ

ថ្ងៃសៅរ៍ ២៣ តុលា ២០២១

ដោយ

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) បើកឆាកពូល K ជាមួយយុវជន U23 ហុងកុង វេលាម៉ោង១រសៀលនៅប្រទេសជប៉ុន (ត្រូវនឹងម៉ោង១១ព្រឹកនៅកម្ពុជា) ថ្ងៃសៅរ៍ ទី២៣ ខែតុលានេះ ក្នុងយុទ្ធនាការណ៍ជម្រុះសន្សំពិន្ទុក្នុងពូលជើងឯកយុវជនទ្វីបអាស៊ី AFC U23 Asian Cup ឆ្នាំ២០២២។

សមាជិកសហព័ន្ធកីឡាបាល់ទាត់ទ្វីបអាស៊ីទាំងអស់ត្រូវប្រជែងគ្នាក្នុងពូលដែលត្រូវបានបែងចែកចាប់ពីពូល A ដល់ K ហើយពូលនីមួយៗភាគច្រើនមាន៤ក្រុម ខណៈពូលខ្លះមាន៣ក្រុម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យុវជនកម្ពុជាស្ថិតនៅពូលចុងក្រោយគេគឺ K ដែលមានក្រុមខ្លាំង U23 ជប៉ុនជាម្ចាស់ផ្ទះ កូរ៉េខាងជើង និងហុងកុង ប៉ុន្តែកូរ៉េខាងជើងបានដកខ្លួន ដូច្នេះពូលនេះមានតែ៣ក្រុមប៉ុណ្ណោះ។

ការប្រកួតសន្សំពិន្ទុក្នុងពូលនេះ ត្រូវជ្រើសរើសយក១៥ក្រុម រួមនឹងអ៊ូសបេគីស្ថានដែលឡើងដោយស្វ័យប្រវត្តិក្នុងនាមជាម្ចាស់ផ្ទះត្រូវជា១៦ក្រុមឡើងទៅជុំផ្តាច់ព្រ័ត្រ។ ចំពោះក្រុម១៥ដែលត្រូវជ្រើសរើសគឺក្រុមលេខ១តាមពូលនីមួយៗ និង៤ក្រុមទៀតជាក្រុមលេខ២ល្អបំផុតក្នុងពូល។

ទាំងយុវជនជម្រើសជាតិកម្ពុជា និងហុងកុងមិនធ្លាប់មានប្រវត្តិឡើងទៅជុំផ្តាច់ព្រ័ត្រក្នុងប្រវត្តិពានរង្វាន់នេះដូចគ្នា ចាប់តាំងពីវាត្រូវបានប្រកួតជាផ្លូវការលើកដំបូងឆ្នាំ២០១៣។ កម្ពុជាត្រូវតែធ្វើឲ្យបានល្អជាមួយហុងកុងដើម្បីមានឱកាសសង្ឃឹមឡើងទៅជុំផ្តាច់ព្រ័ត្រ ពីព្រោះកម្រិតសមត្ថភាពរបស់ហុងកុងមិនលើសខ្វះគ្នាជាមួយយុវជនកម្ពុជាប៉ុន្មានឡើយ។

ទាំងកម្ពុជា និងហុងកុងសុទ្ធតែសង្ឃឹមតិចដូចគ្នាក្នុងការយកឈ្នះក្រុមខ្លាំងជប៉ុនដែលត្រូវបានគេសង្ឃឹមខ្ពស់ជាងគេឡើងទៅជុំផ្តាច់ព្រ័ត្រ។ ដូច្នេះប្រសិនបើ កម្ពុជាអាចយកឈ្នះហុងកុងច្រើនគ្រាប់ ហើយស្មើ ឬចាញ់ជប៉ុនតិចគ្រាប់ នោះកម្ពុជាមានឱកាសអ៊ុតក្រុមចំណាត់ថ្នាក់លេខ២ល្អក្នុងពូលដើម្បីបង្កើតប្រវត្តិសាស្ត្រលើកដំបូងឡើងជុំផ្តាច់ព្រ័ត្រ។

ការប្រកួតបន្ទាប់របស់កម្ពុជាត្រូវប៉ះម្ចាស់ផ្ទះជប៉ុននៅថ្ងៃទី២៦ ខែតុលានេះ ខណៈដល់ថ្ងៃទី២៨ទើបហុងកុងប៉ះជប៉ុន ដូច្នេះមុនជួបជប៉ុន កម្ពុជាសម្រាកបានតិចថ្ងៃជាងហុងកុង។ ការប្រកួតទាំងពីរលើលរបស់កម្ពុជាផ្សាយផ្ទាល់លើផេក សហព័ន្ធកីឡាបាល់ទាត់កម្ពុជា៕

កម្មវិធីប្រកួតពូល K