កីឡា

អ្នកឡើងផ្ដាច់ព្រ័ត្រកម្មវិធី Atomweight World Grand Prix គឺ Stamp និង Phogat

បានផុស

៣ years មុន

នៅ

ថ្ងៃអាទិត្យ ៣១ តុលា ២០២១

ដោយ

កីឡាការិនីពីររូប Stamp Fairtex និង Ritu “The Indian Tigress” Phogat ឈ្នះរៀងៗខ្លួននៅ ព្រឹត្តិការណ៍ ONE: NEXTGEN ក្នុងវគ្គពាក់កណ្ដាលផ្ដាច់ព្រ័ត្រកម្មវិធី ONE Women’s Atomweight World Grand Prix កាលយប់ថ្ងៃទី ២៩ តុលា ដើម្បីឡើងជួបគ្នាវគ្គផ្ដាច់ព្រ័ត្រនាខែធ្នូ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនីថៃ Stamp Fairtex បានយកឈ្នះ កីឡាការិនីប្រេស៊ីល Julie Mezabarba ដោយពិន្ទុជាឯកច្ឆន្ទសម្រាប់គូឯកវគ្គពាក់កណ្ដាលផ្ដាច់ព្រ័ត្រយប់មិញ។ ទឹកដំបូង Mezabarba ហាក់មានប្រៀបដែលដើរសម្រុក ប៉ុន្តែ កីឡាការិនីថៃចាំត្រងពេលកីឡាការិនីប្រេស៊ីលដើរចូល និងចូលឱបគ្នាប្រើក្បាច់ឃ្លេចប្រមាណជិត ២ នាទី មុនវ៉ៃឈរមួយប្រាវរហូតដល់ចប់ទឹក។ ប៉ុន្តែ ទឹកទី២ Stamp មានប្រៀបខ្លាំងដែលអាចប្រើកែងវ៉ៃពីលើក្នុងជំហរដេកផង និងប្រើកណ្ដាប់ដៃសំពងពីលើផង រហូតដល់ចប់ទឹកទី២។ ទឹកកាត់សេចក្ដី ចុងក្រោយ Mezabarba ព្យាយាមសម្រុក វាយយកពិន្ទុ ប៉ុន្តែ សិស្សគុនក្លិប Fairtex មិនឲ្យ ជើងខ្លាំងប្រេស៊ីល ដើរចូលវ៉ៃផ្ដេសផ្ដាសបានទេ ប៉ុន្តែ មានឱកាសប្រើក្បាច់ទៅមកមួយចំនួនចំៗ។ ចប់ការប្រកួត៣ ទឹក Stamp ឈ្នះ Mezabarba ដោយពិន្ទុជាឯកច្ឆន្ទ។

កីឡាការិនីថៃ វ័យ ២៣ ឆ្នាំបានថ្លែងថា៖«អរគុណដល់អ្នកទាំងអស់គ្នាដែលបានគាំទ្ររូបខ្ញុំ។ រាល់ថ្ងៃ ខ្ញុំគិតថា ខ្ញុំរីកចម្រើនទាំងក្បាច់ប្រយុទ្ធ និង MMA (គុនចម្រុះ)។ ខ្ញុំនឹងកាន់តែប្រសើរឡើងថែមទៀតនៅថ្ងៃមុខ។ ខ្ញុំចង់ប្រាប់ Phogat ថា សូមរៀបចំឲ្យបានល្អ យើងនឹងជួបគ្នាដើម្បីជើងឯក ហើយខ្ញុំក៏ខ្លាំងជាងនេះដែរ»។

ចំណែកខ្លាញីឥណ្ឌា Ritu “The Indian Tigress” Phogat យកឈ្នះកីឡាការិនីហ្វីលីពីន Jenelyn Olsim ដោយពិន្ទុជាឯកច្ឆន្ទនាវគ្គពាក់កណ្ដាលផ្ដាច់ព្រ័ត្រដូចគ្នាសម្រាប់គូទី២។ Phogat មានប្រៀបទាំង ៣ ទឹកសម្រាប់ការប្រកួតយប់មិញនេះ។

Phogat បានថ្លែងក្រោយការប្រកួតបែបនេះ៖ «នេះជារឿងដ៏សំខាន់ណាស់សម្រាប់ខ្ញុំ និងការប្រកួតសំខាន់ផងដែរ។ ខ្ញុំផ្ដោតអារម្មណ៍ ១០០% លើការប្រកួតនេះ។ ព្រោះខ្ញុំចង់ក្លាយជាកីឡាការិនីឥណ្ឌាដំបូងឈ្នះជើងឯកឯកពិភពលោក។ នោះហើយជាហេតុផលសំខាន់របំផុតរបស់ខ្ញុំ»។

Stamp Fairtex និង Phogat ឡើងជួបគ្នាវគ្គផ្ដាច់ព្រ័ត្រកម្មវិធី ONE Women’s Atomweight World Grand Prix នៅថ្ងៃទី ៣ ខែ ធ្នូ នាពេលខាងមុខ។ អ្នកទទួលជ័យជម្នះកម្មវិធីនេះ នឹងកក់កៅអីឡើងទៅដណ្ដើមខ្សែក្រវាត់ ONE Women’s Atomweight ពី Angela Lee នាថ្ងៃអនាគត៕

Related Topics:កីឡាប្រដាល់