កីឡា

កំណត់ត្រា៣របស់ប៉េតង់កម្ពុជា ប្រទេសផ្សេងមិនងាយបំបែកបាន

បានផុស

៣ years មុន

នៅ

ថ្ងៃចន្ទ ១៥ វិច្ឆិកា ២០២១

ដោយ

កាលពីម្សិលមិញ កីឡាការិនីប៉េតង់កម្ពុជា អ៊ុក ស្រីមុំ បានឈ្នះមេដាយមាសលើវិញ្ញាយវាយយកពិន្ទុទោលនារីនៃព្រឹត្តិការណ៍ប្រកួតជើងឯកប៉េតង់ពិភពលោកឆ្នាំ២០២១នៅប្រទេសអេស្ប៉ាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការឈ្នះមេដាយមាសឆ្នាំ២០២១នេះមានន័យថា ប៉េតង់កម្ពុជាលេចធ្លោ និងជោគជ័យជាងគេបំផុតសម្រាប់លើវិញ្ញាសាវាយយកពិន្ទុនារីទោលនេះពីព្រឹត្តិការណ៍ប្រកួតជើងឯកប៉េតង់ពិភពលោកដែលប្រារព្ធធ្វើពីរឆ្នាំម្តង។

ចាប់តាំងពីវិញ្ញាសាវាយយកពិន្ទុនារី (Women PRECISION SHOOTING) បានដាក់ឲ្យប្រកួតលើកដំបូងកាលពីឆ្នាំ២០០២ ដែលរហូតដល់ពេលនេះមានរយៈពេល១១រដូវកាលហើយ។ ១១លើកនេះអាចនិយាយបានថា មានកំណត់ត្រាពិសេស៣យ៉ាងសម្រាប់កម្ពុជាដែលជម្រើសជាតិដទៃអាចនឹងពិបាកបំបែកនាពេលអនាគត។

វីរនារី កែ ឡេង ឈ្នះមេដាយមាសពិភពលោកកាលពីឆ្នាំ២០១៥នៅប្រទេសថៃ

កំណត់ត្រាទី១៖ កម្ពុជាឈ្នះបានមេដាយមាសវិញ្ញាសាវាយយកពិន្ទុនារីបានច្រើនជាងគេបំផុតពោលគឺឈ្នះ៥ដងដោយវីរនារី កែ ឡេង ឈ្នះ៤ដងគឺឆ្នាំ២០១៣, ២០១៥, ២០១៧ និង ២០១៩ ហើយចុងក្រោយបំផុត កីឡាការិនី អ៊ុក ស្រីមុំ ឈ្នះនៅឆ្នាំ២០២១នេះនៅប្រទេសអេស្ប៉ាញ។

ចំណែកមេដាយមាស៦លើកផ្សេងទៀតគឺប្រទេសបារាំងឈ្នះ៣ដង ហើយប្រទេសអេស្ប៉ាញ ថៃ និងម៉ាដាហ្គាស្ការឈ្នះបានម្តងម្នាក់ដូចគ្នា។

កំណត់ត្រាទី២៖ កម្ពុជាឈ្នះបានមេដាយមាសវិញ្ញាសាវាយយកពិន្ទុនារីនេះបាន៥លើកជាប់គ្នាពោលគឺចាប់តាំងពីឈ្នះលើកដំបូងនៅឆ្នាំ២០១៣មករហូតដល់ឆ្នាំ២០២១នេះគឺកម្ពុជាឈ្នះរហូត។ ដូច្នេះមានន័យថា កម្ពុជាបានការពារមេដាយមាសពិភពលោករបស់ខ្លួនបានជោគជ័យ៤លើកជាប់គ្នាក្នុងវីរនារី កែ ឡេង ការពារបានជោគជ័យ៣ មុនពេលចូលនិវត្ត ហើយ អ៊ុក ស្រីមុំបន្តវេនការពារបានជោគជ័យទៀត។

កំណត់ត្រាទី៣៖ រឿងអស្ចារ្យមិននឹកស្មានដល់មួយទៀតនោះគឺកម្ពុជាឡើងដល់វគ្គផ្តាច់ព្រ័ត្រវិញ្ញាសាវាយយកពិន្ទុនារីទោលនេះចំនួន៥លើកគឺឈ្នះទាំង៥លើកដែលមិនទាន់ស្គាល់ពាក្យថា ចាញ់ឡើយនៅវគ្គផ្តាច់ព្រ័ត្រ។