កីឡា

មេ ONE នឹងផ្តល់ប្រាក់រង្វាន់លើកទឹកចិត្ត៥ម៉ឺនដុល្លារអាមេរិកគ្រប់ព្រឹត្តិការណ៍ប្រកួត

បានផុស

៣ years មុន

នៅ

ថ្ងៃព្រហស្បតិ៍ ១៣ មករា ២០២២

ដោយ

អគ្គនាយក និងជានាយកប្រតិបត្តិ ONE Championship លោក Chatri Sityodtong នឹងផ្តល់ប្រាក់រង្វាន់លើកទឹកចិត្តបន្ថែម៥ម៉ឺនដុល្លារអាមេរិកសម្រាប់ព្រឹត្តិការណ៍ប្រកួតនីមួយៗ។

ប្រាក់លើកទឹកចិត្តតិចបំផុតក៏មានមួយរង្វាន់ដែលត្រូវផ្តល់ឲ្យកីឡាករម្នាក់នៅព្រឹត្តិការណ៍ប្រកួតនីមួយៗ ប៉ុន្តែអាចមានច្រើនរហូតដល់៥រង្វាន់ដែលការផ្តល់ជូនផ្អែកលើការប្រកួតរបស់កីឡាករម្នាក់ៗ ហើយអ្នកចាញ់ក៏មានឱកាសទទួលបានប្រាក់លើកទឹកចិត្តដែរ។

ស្ថាប័នប្រដាល់ដែលស្ថិតនៅប្រទេសសិង្ហបុរីនឹងរៀបចំការប្រកួតលើកទី១ប្រចាំឆ្នាំ២០២២នាថ្ងៃសុក្រសប្តាហ៍នេះគឺព្រឹត្តិការណ៍ ONE: Heavy Hitters ប៉ុន្តែគោលការណ៍ប្រាក់លើកទឹកចិត្តថ្មីមានប្រសិទ្ធភាពរួចហើយចាប់ផ្តើមតាំងពីព្រឹត្តិការណ៍ប្រកួត ONE Winter Warriors កាលពីខែធ្នូមកម្ល៉េះ។

ការប្រកួតរវាងកីឡាករ Saygid Guseyn Arslanaliev ជាមួយ Timofey Nastyukhin ជាកីឡាករដំបូងគេដែលទទួលបានប្រាក់លើកទឹកចិត្តក្រោមប្រព័ន្ធថ្មី។

លោក Chatri បានផ្តល់ប្រាក់ដល់កីឡាករទាំងពីរចំនួន៥ម៉ឺនដុល្លារអាមេរិកដែលការប្រកួតលើកទី២របស់កីឡាករទាំងពីរនេះត្រូវបានជ្រើសរើសជាការប្រកួតល្អបំផុតប្រចាំឆ្នាំ២០២១ប្រចាំស្ថាប័ន ONE។

តាមពិតទៅលោក Chatri ធ្លាប់ផ្តល់ប្រាក់រង្វាន់លើកទឹកចិត្តដល់កីឡាករដែលប្រកួតទទួលបានការចាប់អារម្មណ៍កាលពីមុន ប៉ុន្តែត្រូវបានផ្លាស់ប្តូរ ហើយឥឡូវនេះត្រូវផ្តល់គ្រប់កម្មវិធីប្រកួត។

ព្រឹត្តិការណ៍ប្រកួត Heavy Hitters ថ្ងៃសុក្រនេះ គូឯកកីឡាការិនីចិន Xiong Jingnan ត្រូវការពារខ្សែក្រវាត់ពិភពលោករបស់នាងទល់នឹងកីឡាការិនីជប៉ុន Ayaka Miura៕