កីឡា

សមាជិកក្រុមនារីកម្ពុជា បង្ហើបពីការយល់ចិត្តគ្នាបណ្ដើរៗនៅក្នុងក្រុម មុនចេញទៅស៊ីហ្គេម នៅវៀតណាម

បានផុស

៣ years មុន

នៅ

ថ្ងៃចន្ទ ២៥ មេសា ២០២២

ដោយ

កីឡាការិនីក្រុមបាល់ទាត់ជម្រើសជាតិកម្ពុជា បាន ជាវៃ បានបង្ហើបឱ្យដឹងថា ខ្លួនជាមួយក្រុមជម្រើសជាតិ ហាក់ចាប់ផ្ដើមយល់ចិត្តគ្នាជាបណ្ដើរៗក្រោយហ្វឹកហាត់បានមួយរយៈ សម្រាប់ក្រុម ត្រៀមស៊ីហ្គេម លើកទី ៣១ ឆ្នាំ ២០២២ នៅវៀតណាម ដែលកម្ពុជា នឹងចូលរួមលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមបាល់ទាត់នារីជម្រើសជាតិកម្ពុជា បាននឹងកំពុងធ្វើការបោះជំរំហ្វឹកហាត់រយៈពេលបីសប្តាហ៍ នៅមជ្ឈមណ្ឌលសាលាបាល់ទាត់ជាតិបាទី មុននឹងចេញទៅប្រទេសវៀតណាម នៅថ្ងៃទី ០៦ ខែមេសា ខាងមុខ។

បាន ជាវៃ ដែលជាកីឡាការិនីមកក្លិបភ្នំពេញក្រោន បានឆ្លើយឆ្លងជាមួយ ‘កម្ពុជាថ្មី’ ដូច្នេះថា៖ «ចំពោះការហ្វឹកហាត់យើងទើបតែធ្វើជាមួយគ្នាបាន ៥,៦ ថ្ងៃ រៀងពិបាកបន្តិច ដោយសារតែយើងមកពីក្លិបផ្សេងៗគ្នា ត្រូវរៀនការយល់ពីគ្នា ពីទម្រង់លេង។ មួយទៀតយើងត្រូវហ្វឹកហាត់ ១ ថ្ងៃ ២ ដងអ៊ីចឹងយើងរៀងក្ដៅនឹងអាកាសធាតុ។»

«ប្រហែលជាចូលដល់អាទិត្យទី ២ យើងអាចនឹងចាប់ផ្ដើមរៀនយល់ពីគ្នាបានច្រើន ហើយយើងផ្ដើមរៀនពីទម្រង់ដើម្បីឱ្យវាបានល្អប្រសើរជាងហ្នឹង។» បាន ជាវៃ បានបន្ថែម។

សូមបញ្ជាក់ថា ក្រុមមបាល់ទាត់ជម្រើសជាតិនារីកម្ពុជា នឹងចូលរួមប្រកួតស៊ីហ្គេម លើកទី ៣១ ឆ្នាំ ២០២២ នៅប្រទេសវៀតណាម លើប្រភេទកីឡាបាល់ទាត់ ក្នុងវិញ្ញាសាបាល់ទាត់នារី ដែលគ្រោងចាប់ផ្ដើមមុនពិធីបើក (ពិធីបើកនៅថ្ងៃទី ១២ ខែឧសភា) នៅថ្ងៃទី ០៦ ខែឧសភា ឆ្នាំ ២០២២ ហើយ កម្ពុជា ស្ថិតនៅពូល A ជាមួយម្ចាស់ផ្ទះវៀតណាម និងហ្វីលីពីន ខណៈឥណ្ឌូនេស៊ី បានសម្រេចដកខ្លួនចេញពីព្រឹត្តិការណ៍។

កីឡាការិនីម្ចាស់ស្បែកជើងមាស លីគបាល់ទាត់នារីកម្ពុជា ដដែលរូបនេះបាននិយាយពីការដកខ្លួនរបស់ឥណ្ឌូនេស៊ី ផងដែរថា៖ «សម្រាប់ការដកខ្លួនរបស់ឥណ្ឌូនេស៊ីវិញ ជាក្រុមមួយដែលយើងអាចលេងជាមួយគាត់បានអ៊ីចឹងយើងបាត់បង់ឱកាសនៅក្នុងការបង្ហាញខ្លួន និងការលេងជាមួយនឹងពួកគាត់ ប៉ុន្តែដែលសំខាន់យើងមានសម្ពាធ ដោយសារតែមាន ៣ ក្រុម ហើយក្រុមដែលនៅសុទ្ធតែជាក្រុមខ្លាំង ប៉ុន្តែអ្វីដែលសំខាន់ពួកខ្ញុំនឹងព្យាយាមឱ្យអស់ពីលទ្ធភាព។»

បាន ជាវៃ បានចាប់ផ្ដើមលេងបាល់ទាត់ជាមួយក្រុមមួយរបស់ខេត្តបាត់ដំបងគឺ Might Girl ចន្លោះឆ្នាំ ២០១០ ដល់ ២០១៥ ដែលក្រុមនេះ គឺលេងពេលខ្លួនកំពុងស្ថិតនៅក្នុងមណ្ឌលកុមារកំព្រាខេត្តបាត់ដំបង។ ក្រោយពេលរៀនចប់ថ្នាក់ទី១២ ត្រូវមករៀននៅភ្នំពេញ ជាវៃ ត្រូវរកសាលារៀនដោយខ្លួនឯង រហូតដល់ឆ្នាំ ២០១៥ ក្មេងស្រីកំព្រាខាងលើ ក៏ទទួលបានឱកាសចូលហាត់បាល់នៅភ្នំពេញក្រោន ហើយភ្នំពេញក្រោនក៏បានជួយឲ្យខ្លួនបានរៀនចប់ចុងជាប់ដើមនៅឆ្នាំ២០១៩៕

អត្ថបទ៖ មន្នីរ័ត្ន

Related Topics:កីឡាបាល់ទាត់