កីឡា

ញាន សុស៊ីដាន រីករាយក្រោយជាប់បញ្ជីបឋមស៊ីហ្គេម ទៅវៀតណាម ខណៈដើមឡើយអត់មានសង្ឃឹមនឹងបានជាប់

បានផុស

៣ years មុន

នៅ

ថ្ងៃចន្ទ ២៥ មេសា ២០២២

ដោយ

នៅព្រឹកថ្ងៃទី ២៥ ខែមេសា ឆ្នាំ ២០២២ សហព័ន្ធកីឡាបាល់ទាត់កម្ពុជា បានប្រកាសបញ្ជីឈ្មោះបឋមកីឡាករអាយុក្រោម ២៣ ឆ្នាំជម្រើសជាតិកម្ពុជា ចំនួន ២៦ នាក់ ដើម្បីត្រៀមការប្រកួតកីឡាបាល់ទាត់ នៃព្រឹត្តិការណ៍កីឡាអាស៊ីអាគ្នេយ៍ លើកទី ៣១ ឆ្នាំ ២០២២ នៅប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមកីឡាករ ២៦ នាក់ យុវជនមួយរូបមកពីក្លិបកងយោធពលខេមរភូមិន្ទ កីឡាករ ញាន សុស៊ីដាន បានបង្ហើបឱ្យដឹងថា ដើមឡើយខ្លួនមិនរំពឹងថា បានជាប់ទៅស៊ីហ្គេមឡើយដោយសារបញ្ហារបួស ដ្បិតក្រោយមកមានឈ្មោះក្នុងបញ្ជីបឋម។

ញាន សុស៊ីដាន បានបង្ហាញអារម្មណ៍ថា៖ «សម្រាប់ខ្ញុំ ខ្ញុំមានអារម្មណ៍រំភើប ហើយនឹងសប្បាយចិត្ត ចំពោះការជាប់ឈ្មោះ មានឈ្មោះទៅលេងស៊ីហ្គេម លើកទី ១។ ពីដំបូងខ្ញុំអត់គិតថា ខ្ញុំនឹងអាចមានឈ្មោះទៅលេងស៊ីហ្គេមដែរ ចឹងពេលមានឈ្មោះជាប់ទៅលេងស៊ីហ្គេម លើកដំបូងខ្ញុំមានអារម្មណ៍សប្បាយចិត្តខ្លាំង»។

កីឡាករវ័យ ២០ ឆ្នាំរូបនេះបានឱ្យ ‘កម្ពុជាថ្មី’ ដឹងពីមូលហេតុដែលខ្លួនមិនរពឹងដូច្នេះថា៖ «ខ្ញុំមិនរំពឹងថាខ្ញុំអាចនឹងជាប់ដោយសារដំបូងខ្ញុំរបួស ខ្ញុំអត់បានប្រកួតក្នុងលីគប៉ុន្មានប្រកួតដែរ ហើយដល់ពេលខ្ញុំជាបានចូលបង្ហាញខ្លួនវិញ ដូចជាមានអារម្មណ៍ខ្លួនខ្ញុំថាអត់សូវមានភាពលេចធ្លោខ្លាំង ចឹងទៅក៏ខ្ញុំគិតថាខ្លួនឯងអត់អាចនឹងជាប់។»

ចាំបានថា ញាន សុស៊ីដាន កាលពីក្នុងព្រឹត្តិការណ៍ AFF U-23 Championhsip 2022 ដែលកម្ពុជា ធ្វើជាម្ចាស់ផ្ទះកាលពីខែកុម្ភៈ កន្លងទៅក៏បានក្លាយជាផ្នែកមួយនៃក្រុមផងដែរ ថែមទាំងបានបង្ហាញខ្លួន ៣ ប្រកួតទាត់បញ្ចូលទីបាន ១ គ្រាប់ បើទោះបីជាពេលនោះខកខានមិនអាចនាំក្រុមឡើងទៅវគ្គបន្តក៏ដោយ។

រំឭកប្រវត្តិអាជីពបាល់ទាត់របស់ ញាន សុស៊ីដាន ត្រូវបានអ្នកស្នេហាវិស័យកីឡាបាល់ទាត់មើលឃើញពីការវិវឌ្ឍន៍ខ្លួនរបស់គេយ៉ាងឆាប់រហ័ស ត្បិតយុវជនដែលមកពីខេត្តស្វាយរៀង និងធ្លាប់តែលេងពានប្រចាំស្រុក និងប្រចាំខេត្ត ទើបតែប្រឡូកក្នុងបាល់ទាត់អាជីពនៅចុងឆ្នាំ ២០២០ កន្លងទៅថ្មីៗ ជាមួយ U-21 Tiffy Army ក្រោយធ្វើតេស្តជាប់ដើម្បីចូលរួមលេងលីគទី ២ និងបន្ទាប់មកទៀតគេត្រូវបានតម្លើងមកកាន់ក្រុមធំនៃ សមាគមកីឡាកងយោធពលខេមរភូមិន្ទ (Tiffy Army) លេងនៅលីគកំពូលកម្ពុជា រហូតទទួលបានឱកាសជាប់ជម្រើសជាតិកម្ពុជា អាយុក្រោម ២៣ ឆ្នាំ និងជម្រើសជាតិកម្ពុជា ឈុតធំ ក្នុងឆ្នាំតែមួយ៕

អត្ថបទ៖ មន្នីរ័ត្ន

Related Topics:កីឡាករបាល់ទាត់ជាតិ