គ្រូជំនួយ U-23 កម្ពុជា បង្ហើបពីលក្ខខណ្ឌនៃការជ្រើសរើសកីឡាករ ២០នាក់ចុងក្រោយ សម្រាប់ស៊ីហ្គេមនៅវៀតណាម

គ្រូជំនួយនៃក្រុម U23 កម្ពុជាលោក ភា សុភ័ក្ត្រា ដែលបច្ចុប្បន្នកំពុងស្ថិតនៅក្នុងជំរំហ្វឹកហាត់ជាមួយក្រុម និងត្រូវត្រៀមចេញទៅប្រកួត ក្នុងព្រឹត្តិការណ៍កីឡាស៊ីហ្គេម លើកទី ៣១ នៅប្រទេសវៀតណាម ខែក្រោយ បានបង្ហើបពីលក្ខខណ្ឌនៃការជ្រើសរើសកីឡាករ ២០នាក់ ចុងក្រោយមុនការចេញដំណើរ។ បច្ចុប្បន្ន U-23 កម្ពុជា កំពុងធ្វើការហ្វឹកហាត់នៅពហុកីឡដ្ឋានជាតិមរតកតេជោ ជាមួយនឹងសមាសភាពកីឡាករ ២៦នាក់ មកពីក្លិបចំនួន ១០នៃលីគទី ១ និងទី ២ កម្ពុជា មុននឹងជម្រុះមកនៅត្រឹម ២០នាក់។

លោក ភា សុភ័ក្ត្រា គ្រូជំនួយនៃក្រុម U23 កម្ពុជា បាននិយាយយ៉ាងដូច្នេះថា «សម្រាប់ដំណាក់កាលនេះ យើងបានកោះហៅ ២៦នាក់ ហើយបើអ្នកចាំទី បើតាមការគិតគឺដោយសារចំនួនតិច ដែលត្រូវទៅ ២០នាក់ អ៊ីចឹងអ្នកចាំទីយើងអត់អាចតម្រូវទុក ៣បានទេ យើងយកតែ ២ទេ»។

«លក្ខខណ្ឌមួយចំនួន នៃការវាយតម្លៃក្នុងការជម្រុះកីឡាករ ៦នាក់នោះ គឺយើងមើលទៅលើការប្រឹងប្រែងរបស់គាត់ ចរិកលក្ខខណៈនៃការប្រមូលផ្ដុំ វិន័យ ហើយនឹងការយល់អំពីតាក់ទិច ដែលគ្រូបានកំណត់ឲ្យថា ពួកគាត់អាចទទួលបានប៉ុណ្ណា ពីព្រោះភាពយល់របស់តាក់ទិចនេះ បើសិនជាយើងមិនទទួលយកបានវាបង្កើតជាបញ្ហា សម្រាប់ការលេងនៅលើទីលាន អ៊ីចឹងហើយយើងត្រូវពិនិត្យទាំងអស់ បច្ចេកទេស វិន័យ និងការប្រឹងប្រែង ហើយនឹងការស្វែងយល់អំពីតាក់ទិច និងជាពិសេសនោះគឺទំនោរ ឬក៏របៀបនៃការលេងរបស់គ្រូតែម្ដង»។ លោក ភា សុភ័ក្ត្រា បានបន្ថែម។

តាមគម្រោងកីឡករកម្ពុជា នឹងចាកចេញទៅប្រទេសវៀតណាម នាថ្ងៃទី ៤ ខែឧសភា ឆ្នាំ២០២២ គឺ ២ថ្ងៃ មុនវិញ្ញាសារ​បាល់ទាត់បុរសចាប់ផ្ដើម ប៉ុន្តែកម្ពុជា ប្រកួតបើកឆាកនៅថ្ងៃទី ៩។ ក្រុមបាល់ទាត់ជម្រើសជាតិកម្ពុជាអាយុក្រោម ២៣ឆ្នាំ ត្រូវបានចាប់ឆ្នោតស្ថិតទៅពូល B សម្រាប់ប្រភេទកីឡាបាល់ទាត់លើវិញ្ញា​សារបាល់ទាត់បុរស ក្នុងព្រឹត្តិការណ៍កីឡាអាស៊ីអាគ្នេយ៍ លើកទី ៣១ នៅប្រទេសវៀតណាម ដោយរួមពូលជាមួយក្រុមថៃ, ម៉ាឡេស៊ី, សិង្ហបុរី និងឡាវ៕

អត្ថបទ៖ មន្នីរ័ត្ន