កីឡា

កីឡាករព្រះខ័នរាជស្វាយរៀង មិន រតនៈ ប្តេជ្ញាចិត្តមោះមុតជាមួយ U-23 កម្ពុជា ប្រកួតក្នុងស៊ីហ្គេម

បានផុស

៣ years មុន

នៅ

ថ្ងៃចន្ទ ៩ ឧសភា ២០២២

ដោយ

ចូលដល់ថ្ងៃទី០៩ ខែឧសភា ឆ្នាំ២០២២ នេះ ការប្រកួតដែលអ្នកគាំទ្រទន្ទឹងរង់ចាំបានមកដល់សម្រាប់ប្រភេទកីឡាបាល់ទាត់ វិញ្ញាសាបុរស (អាយុក្រោម ២៣ ឆ្នាំ) នៃព្រឹត្តិការណ៍ស៊ីហ្គេម របស់ U-23 កម្ពុជា ក្នុងពូល B ដែលត្រូវប្រកួតជាមួយ U-23 ឡាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅមុនការប្រកួតមកដល់ កីឡាករ មិន រតនៈ ដែលជាខ្សែបម្រើកណ្ដាលរបស់ក្លិបព្រះខ័នរាជស្វាយរៀង បានបង្ហាញការតាំងចិត្តមុះមុតក្នុងការជួយកម្ពុជា ដ្បិតខ្លួនផ្ទាល់ និងក្រុមទាំងមូលបានត្រៀមខលួនរួចរាល់។

មិន រតនៈ បាននិយាយយ៉ាងដូច្នេះថា៖ «សម្រាប់ខ្ញុំ ក៏ដូចជាក្រុមទាំងមូលគឺយើងបានត្រៀមខ្លួនរួចរាល់អស់ហើយ ទាំងកម្លាំងចិត្ត ទាំងបច្ចេកទេស និងតាក់ទិចអីគឺយើងត្រៀមខ្លួនបានរួចរាល់។ ការជម្រុះលើកទី ២ កីឡាករម្នាក់ៗសុទ្ធតែល្អៗ ហើយការជម្រុះយក ២០ នាក់ គ្រូគាត់មានរបៀបរើសដោយដឹងថាគាត់រើសកីឡាករហ្នឹងទៅអាចលេងកន្លែងណា ហើយនឹងត្រូវតាក់ទិចគាត់ ហើយសម្រាប់ការប្រកួតលើកនេះសង្ឃឹមថាយើងនឹងធ្វើបានល្អ។» និយាយអំពីគោលដៅ យុវជនដែលបច្ចុប្បន្នរ៉ាប់រងតួនាទីតំបន់បម្រើរបស់ក្លិបព្រះខ័នរាជស្វាយរៀងរូបនេះ បានសង្កត់ធ្ងន់ថា៖ «ពួកខ្ញុំមានគោលដៅចង់ឈ្នះឡើងទៅវគ្គបន្ត ក៏ដូចជាដណ្ដើមមេដាយ ដោយពួកយើងនឹងខំប្រឹងឱ្យអស់ពីសមត្ថភាព។»

សូមបញ្ជាក់ថា ក្រុម U-23 កម្ពុជា នឹងត្រូវប្រកួតជាមួយ U-23 ឡាវ នៅវេលាម៉ោង ៤:០០ រសៀល នាកីឡដ្ឋាន Thien Truong ដែលមានចម្ងាយប្រមាណ ៩០គីឡូម៉ែត្រពីរដ្ឋធានីហាណូយ។ ការប្រកួតនេះមានការផ្សាយផ្ទាល់នៅលើកញ្ចក់ទូរទស្សន៍ជាតិ ទទក ខណៈអ្នកគាំទ្រដែលនៅប្រទេសវៀតណាម អាចចូលទស្សនាបានដោយសេរីផងដែរ៕

អត្ថបទ៖ មន្នីរ័ត្ន

Related Topics: