កម្ពុជា ឈ្នះមេដាយមាសទី៥ លើប្រភេទកីឡាចំបាប់ នៅស៊ីហ្គេមវៀតណាម

កីឡាករ ស៊ូ បាលី ក្លាយជាម្ចាស់មេដាយមាសទី៥ សម្រាប់កម្ពុជា ក្នុងព្រឹត្តិការណ៍កីឡាស៊ីហ្គេមលើក​ទី៣១​នៅវៀតណាម បន្ទាប់ពីបានយកឈ្នះលើប្រភេទកីឡាចំបាប់ នៅមុននេះបន្តិច។

ស៊ូ បាលី ទទួលបានមេដាយមាស ក្រោយយកឈ្នះកីឡាករឡាវ ១០-០ នៅវគ្គផ្តាច់ព្រ័ត្រ ក្នុងវិញ្ញាសានុ​រស​Freestyle ទម្ងន់១២៥គីឡូក្រាម។ 

នៅវគ្គពាក់កណ្តាលផ្តាច់ព្រ័ត្រ ស៊ូ បាលី ក៏បានយកឈ្នះម្ចាស់ផ្ទះវៀតណាម ១០-០ ផងដែរ។ នេះជាមេដាយមាសទី ៥របស់ កម្ពុជានៅវៀតណាម។

ដូច្នេះគិតត្រឹមថ្ងៃនេះកម្ពុជាឈ្នះមេដាយសរុប២៥គ្រឿហើយក្នុងនោះមាស៥គ្រឿងប្រាក់៦គ្រឿងនិងសំរឹទ្ធ១៤គ្រឿង។

មេដាយមាស៥លើប្រភេទកីឡាឃីកបុកស៊ីង, កីឡាប៊ូលនិងប៉េតង់, កីឡាវ៉ូវីណាម, កីឡាតេក្វាន់ដូWT និងកីឡាចំបាប់, ខណៈមេដាយប្រាក់៦លើកីឡាឃីកបុកស៊ីង, កីឡាប៊ូលនិងប៉េតង់, កីឡាតេក្វាន់ដូWT និងកីឡាវ៉ូវីណាមស្របពេលដែលមេដាយសំរឹទ្ធ១៤មាននៅលើកីឡាឃីកបុកស៊ីង១, កីឡាប្រណាំងទូក១, កីឡាប៊ូលនិងប៉េតង់៣, កីឡាជឺជីតស៊ូ ១, កីឡាវូស៊ូ ៣, កីឡាតេក្វាន់ដូ WT ២, កីឡាវ៉ូវីណាម ១ និងកីឡាចាំបាប់ ២៕

អត្ថបទ៖ មន្នីរ័ត្ន