កីឡា

មិនធម្មតាប្រើពេល១៤ឆ្នាំ ទើបភ្នំពេញហ្គាឡាក់ស៊ីសម្រេចគោលដៅធំ

បានផុស

៣ years មុន

នៅ

ថ្ងៃចន្ទ ១៣ មិថុនា ២០២២

ដោយ

ក្រុមបាល់ទាត់ភ្នំពេញហ្គាឡាក់ស៊ីទើបតែឈ្នះពានរង្វាន់សម្តេចតេជោ ហ៊ុន សែន ថ្នាក់ខេត្ត លើកទី១៦ ឆ្នាំ២០២២ បន្ទាប់ពីឈ្នះក្រុមខេត្តឧត្តរមានជ័យដោយលទ្ធផល ១-០ ក្នុងវគ្គផ្តាច់ព្រ័ត្រកាលពីថ្ងៃទី១១ ខែមិថុនា កន្លងទៅនេះ។

ការគ្រងជើងឯកនេះគឺការសម្រេចបាននូវសមិទ្ធផលធំបំផុតរបស់ក្រុម បន្ទាប់ពីបានដើរលើវិថីបាល់ទាត់រយៈពេល១៤ឆ្នាំ។ នេះជាការបញ្ជាក់របស់លោក ប៉ូ គីនណាក់ អ្នកចាត់ការទូទៅរបស់ក្រុមភ្នំពេញហ្គាឡាក់ស៊ី។

ក្រុមភ្នំពេញហ្គាឡាក់ស៊ី ឈ្នះពានរង្វាន់សម្តេចតេជោ ហ៊ុន សែន ថ្នាក់ខេត្ត

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ូ គីនណាក់ បានរៀបរាប់ថា ពានរង្វាន់សម្តេចតេជោ ហ៊ុន សែន នេះគឺជាគោលដៅធំបំផុត សម្រាប់ក្រុមចាប់តាំងពីត្រូវបានបង្កើតឡើងមានរយៈពេល១៤ឆ្នាំមកហើយ។ ក្រុមត្រូវបានបង្កើតឡើងតាំងពីមិនទាន់មានគេស្គាល់ និងបាតដៃទទេរហូតដល់ឆ្នាំ២០១៧។ ក្នុងរយៈពេល៩ឆ្នាំនេះ ក្រុមដាក់គោលដៅធំបំផុតគឺចូលលេងពានរង្វាន់សម្តេចតេជោ ហ៊ុន សែន។

នៅឆ្នាំ២០១៧ ក្រុមភ្នំពេញហ្គាឡាក់ស៊ីបានចូលលេងពានរង្វាន់មួយប្រចាំខេត្តបាត់ដំបង ហើយក៏ត្រូវបានមហាជនស្គាល់ និងឲ្យតម្លៃពីសមត្ថភាពរបស់ក្រុមចាប់ពីពេលនោះមក។ នៅពេលនោះ ក្រុមបានក្លាយជាជើងឯក និងត្រូវបានអាជ្ញាធរខេត្តបាត់ដំបងជ្រើសរើសតំណាងខេត្តចូលលេងពានរង្វាន់សម្តេចតេជោ ហ៊ុន សែន។

អ្នកចាត់ការទូទៅបានប្រាប់ថា ៖«នោះជាក្តីស្រមៃដែលក្រុមរបស់យើងទទួលបានឱកាសលេងពានសម្តេចតេជោ ពីព្រោះក្រុមយើងចង់លេងពានរង្វាន់សម្តេចខ្លាំងណាស់ ជាច្រើនឆ្នាំមកហើយ»។ ទោះជាឆ្នាំដំបូងមិនទទួលបានល្អប្រសើរយ៉ាងណា ក៏ក្រុមរបស់លោកបានឡើងដល់វគ្គ១៦ក្រុម ដោយបានចាញ់ក្រុមខេត្តកំពត ប៉ុន្តែក្រុមនេះចាត់ទុកជាមោទកភាពមួយដែរ។

ក្រោយមកក្រុមរបស់លោកដែលមានឈ្មោះដើម Sporting Galaxy បានលេងតំណាងឲ្យខេត្តពោធិ៍សាត់បាន២ឆ្នាំក្នុងពានរង្វាន់សម្តេចតេជោ ហ៊ុន សែន ដដែល និងបានឡើងដល់វគ្គ១៦ក្រុមចុងក្រោយទៀត។

នៅឆ្នាំទី៤ ខាងមន្ទីរអប់រំរាជធានីភ្នំពេញបានផ្តល់សេចក្តីទុកចិត្តឲ្យលេងពានរង្វាន់សម្តេចតេជោ ហ៊ុន សែន នៅមណ្ឌលទី៣ សម្រាប់ឆ្នាំ២០២១ និង២០២២។ ពេលនោះ ក្រុមមួយនេះបន្ថែមឈ្មោះ«ភ្នំពេញហ្គាឡាក់ស៊ី » និងបានឡើងដល់វគ្គ៨ក្រុមចុងក្រោយ ដោយចាញ់ក្រោមថ្វីជើងរបស់ក្រុមខេត្តត្បូងឃ្មុំ។

លោក ប៉ូ គីនណាក់ បានបញ្ជាក់ថា ៖«ទោះជាយ៉ាងណា យើងខ្ញុំនៅតែព្យាយាម ហើយព្យាយាមទៀត។ ព្យាយាមមិនបោះបង់ចោល។ ទីបំផុតយើងសម្រេចបានលទ្ធផលធំគឺឈ្នះជើងឯកពានរង្វាន់សម្តេចតេជោ ហ៊ុន សែន ថ្នាក់ខេត្ត លើកទី១៦ ឆ្នាំ២០២២នេះ»។

ក្រុមនេះគ្មានមហិច្ឆតាចូលលេងក្រុបខណ្ឌអាជីពគឺលីគកំពូលកម្ពុជាឡើយ។ ក្រុមនេះដាក់គោលដៅលេងត្រឹមតែពានរង្វាន់សម្តេចតេជោ ហ៊ុន សែន ប៉ុណ្ណោះ។

ក្រៅពីគោលដៅសំខាន់មួយនេះរបស់ភ្នំពេញហ្គាឡាក់ស៊ីគឺរួមចំណែកបណ្តុះបណ្តាល និងអភិវឌ្ឍវិស័យកីឡាបាល់ទាត់នៅកម្ពុជា។ លោក គីនណាក់ ប្រាប់ថា ៖«យើងអត់មានគោលដៅចូលលេងលីគអាជីពទេ។ គ្រាន់តែថា អ្វីដែលយើងមានលទ្ធភាព សមត្ថភាព ហើយពេលវេលាគឺបណ្តុះ អភិវឌ្ឍកីឡាករឲ្យបានល្អដើម្បីឲ្យពួកគាត់មានផ្លូវឆ្ពោះទៅកាន់លេងក្លឹបអាជីព លីគអាជីពតាមដែលអាចធ្វើទៅបាន»៕