កីឡា

U19 កម្ពុជា មានបញ្ហាកង្វះខាតកីឡាករ ចេញទៅប្រកួត AFF U19 នៅឥណ្ឌូនេស៊ី

បានផុស

២ years មុន

នៅ

ថ្ងៃសុក្រ ២៤ មិថុនា ២០២២

ដោយ

លោក Kuji Gyotoku គ្រូបង្វឹកនៃក្រុមជម្រើសជាតិកម្ពុជា អាយុក្រោម ១៩ឆ្នាំ បានបង្ហើបឲ្យដឹងពីបញ្ហាកង្វះខាតកីឡាករសំខាន់មួយចំនួន ក្នុងការប្រកួតពានរង្វាន់ជើងឯកយុវជនអាស៊ានអាយុក្រោម ១៩ឆ្នាំ (AFF U-19 Championship) នៅដើមខែកក្កដាខាងមុខ។

កាលពីថ្ងៃទី២២ ខែមិថុនា ឆ្នាំ២០២២ សហព័ន្ធកីឡាបាល់ទាត់កម្ពុជា បានប្រកាសបញ្ជីឈ្មោះកីឡាករជម្រើសជាតិអាយុក្រោម ១៩ឆ្នាំ ចំនួន ២៣នាក់ជាផ្លូវការ ដើម្បីត្រៀមប្រកួតពានរង្វាន់ដដែលខាងលើ ប៉ុន្តែបានមើលឃើញថានៅមានកីឡាករមានសក្ដានុពលមួយចំនួន ពុំត្រូវបានកោះហៅចូលក្រុមឡើយ។

លោក Kuji Gyotoku ដែលជាគ្រូបង្វឹកបានបញ្ជាក់ចំពោះរឿងនេះថា «ដោយសារកីឡាករមួយចំនួនដែលមានអាយុត្រឹមត្រូវនឹងអាចលេងក្នុងបានរង្វាន់ AFF Boys U19 Championship 2022 នេះបាននៅតាមក្លិបរបស់ពួកគេគឺជាកីឡាករសំខាន់ ហេតុដូចនេះហើយទើបយើងមិនបានហៅពួកគេមកចូលរួមនោះទេ គឺដើម្បីឱ្យពួកគេមានឱកាសជួយក្រុមនៃក្លិបរបស់ពួកគេដែលមានប្រកួតប្រជែងក្នុងកម្រិតខ្ពស់»។

ដោយហេតុផលនេះ លោកសង្កត់ធ្ងន់ថា ក៏សម្រេចចិត្តផ្ដល់ឱកាសកីឡាករដែលមានសមត្ថភាពផ្សេងទៀតមកចូលរួមប្រកួតក្នុងពានរង្វាន់នេះ។

តាមដែរដឹង មូលហេតុទាំងនេះក៏មានជាប់ពាក់ព័ន្ធនឹងគោលការណ៍ថ្មីនៃលីគកំពូលកម្ពុជា ដែលតម្រូវឱ្យក្លិបទាំង៨ ដាក់កីឡាករអាយុក្រោម ២២ឆ្នាំប្រកួតក្នុងលីគ ហើយមួយចំនួនឃើញថាកីឡាករដែលមានអាយុក្រោម ២២ឆ្នាំនោះ គឺសុទ្ធតែជាកីឡាករដែលបានចូលប្រកួតជាមួយក្រុមរបស់គេរៀងៗខ្លួនផងដែរ និងករណីបើយកកីឡាករនោះទៅចូលរួមនឹងធ្វើឱ្យគេមានកង្វះកីឡាករ ដូចជាក្លិបភ្នំពេញក្រោន ជាដើម។

ពានយុវជនអាស៊ីអាគ្នេយ៍អាយុក្រោម ១៩ឆ្នាំ (AFF U-19 Championship) គ្រោងធ្វើពីថ្ងៃទី០២ ដល់ថ្ងៃទី១៥ នៅខែកក្កដា ឆ្នាំ២០២២។ ក្រុមជម្រើសជាតិកម្ពុជា អាយុក្រោម ១៩ឆ្នាំ ស្ថិតនៅពូល B ជាមួយ ម៉ាឡេស៊ី, ឡាវ, ទីម័រខាងកើត និងសិង្ហបុរី៕

អត្ថបទ ៖ មន្នីរ័ត្ន