ជម្រើសជាតិកម្ពុជា អាយុក្រោម១៩ឆ្នាំ ចេញទៅប្រកួតនៅឥណ្ឌូនេស៊ី ថ្ងៃទី​៣០ មិថុនា

ក្រុមជម្រើសជាតិកម្ពុជាអាយុក្រោម ១៩ឆ្នាំ នឹងចេញទៅប្រទេសឥណ្ឌូនេស៊ី នៅថ្ងៃទី៣០ ខែមិថុនា ឆ្នាំ២០២២ ខាងមុខនេះ ដើម្បីចូលរួមប្រកួតពានរង្វាន់ជើងឯកយុវជនអាស៊ានអាយុក្រោម ១៩ឆ្នាំ (AFF U-19 Championship)។

ការចេញទៅថ្ងៃទី៣០ ខែមិថុនានេះ គឺ៣ថ្ងៃមុនការប្រកួតមកដល់ ពេលដែលពូលរបស់កម្ពុជា ចាប់ផ្ដើមនៅថ្ងៃទី០៣ ខែកក្កដា ឆ្នាំ២០២២ ដោយបើកឆាកគោព្រៃជំទង់ នឹងត្រូវជួប សិង្ហបុរី។

ប្រកួតទី២ U19 កម្ពុជា ត្រូវជួប ម៉ាឡេស៊ី នៅថ្ងៃទី០៥ ខែកក្កដា បន្ទាប់មកប្រកួតទី៣ ជួប U19 ឡាវ នៅថ្ងៃទី០៧ ខែកក្កដា ខណៈថ្ងៃទី០៩ ខែកក្កដា កម្ពុជា សម្រាកពុំមានការប្រកួត និងប្រកួតចុងក្រោយថ្ងៃទី១១ ខែកក្កដា ជួប U19 ទីម័រខាងកើត។

គួររំឮកថា កីឡាករ ២៣នាក់ចុងក្រោយជាផ្លូវការ មកពីក្លិប ៧ផ្សេងគ្នាទាំងនៅលីគកំពូល និងលីគទី២កម្ពុជា ពោលមានមកពីសាលាបាល់ទាត់ជាតិបាទី ចំនួន ១៣នាក់, អាស៊ីអឺរ៉ុបយូណាយធី ៣នាក់, ព្រៃវែង ៣នាក់, ណាហ្គាវើលដ៍ ១នាក់, គីរីវង់សុខសែនជ័យ ១នាក់, សមាគមកីឡាកងយោធពលខេមរភូមិន្ទ ១នាក់ និងអង្គរថាយហ្គឺរ ១នាក់។

ពានយុវជនអាស៊ីអាគ្នេយ៍អាយុក្រោម ១៩ឆ្នាំ (AFF U-19 Championship) គ្រោងធ្វើពីថ្ងៃទី០២ ដល់ថ្ងៃទី១៥ នៅខែកក្កដា ឆ្នាំ២០២២។ ក្រុមជម្រើសជាតិកម្ពុជា អាយុក្រោម ១៩ឆ្នាំ ស្ថិតនៅពូល B ជាមួយ ម៉ាឡេស៊ី, ឡាវ, ទីម័រខាងកើត និងសិង្ហបុរី៕ អត្ថបទ៖ មន្នីរ័ត្ន