កីឡា

ឡុង ភារ៉ាត់ មានគោលដៅចម្បង២ពេលចូលព្រះខ័នរាជស្វាយរៀង

បានផុស

២ years មុន

នៅ

ថ្ងៃពុធ ២៩ មិថុនា ២០២២

ដោយ

ឡុង ភារ៉ាត់ បានឆ្លងកាត់ក្នុងក្លឹបបាល់ទាត់ជាច្រើនមុនពេលលេចធ្លោក្នុងក្លឹបអាជីពព្រះខ័នរាជស្វាយរៀង និងក្រុមបាល់ទាត់ជម្រើសជាតិកម្ពុជាក្រុមធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករខ្សែបម្រើអាយុ២៤ឆ្នាំបានចូលព្រះខ័នរាជស្វាយរៀងកាលពីដើមឆ្នាំ២០២២កន្លងទៅនេះ។ រូបគេជាអតីតយុវជនភ្នំពេញរយៈពេលប្រហែលជា៥ឆ្នាំមុនផ្លាស់ចូលក្លឹបអាជីព វេស្ទើន ភ្នំពេញ អេហ្វស៊ី ក្នុងឆ្នាំ២០១៦។

ឆ្នាំ២០១៨ ឡុង ភារ៉ាត់ បានផ្លាស់ទៅនៅក្លឹប សូលទីឡូអង្គរ រហូតដល់ឆ្នាំ២០១៩ ទើបបានបន្តផ្ទេរទៅចូលរួមជាមួយ ក្លឹបអង្គរថាយហ្គឺរ។ លេងជាមួយក្លឹបអាជីពដែលមានម្ចាស់ជាជនជាតិជប៉ុននេះគឺជាឱកាសដែលរូបគេបង្ហាញសមត្ថភាពកាន់តែអស្ចារ្យ និងគួរឲ្យចាប់អារម្មណ៍ ហើយទីបំផុតក្លឹបអាជីពធំ ព្រះខ័នរាជស្វាយរៀង នាំចូលក្នុងឆ្នាំ២០២២។

សម្រាប់ការផ្ទេរមកកាន់ក្លឹបព្រះខ័នរាជស្វាយរៀងនេះ ឡុង ភារ៉ាត់ បានប្រាប់ថា ៖«ខ្ញុំឆ្លងកាត់បទពិសោធនៅក្លឹបជាច្រើនដែលពីមួយក្លឹបទៅមួយក្លឹប ខ្ញុំតែងតែបានរៀនសូត្រ និងអភិវឌ្ឍខ្លួនរហូត។ មើលឃើញសមត្ថភាពខ្លួនកាន់តែរីកចម្រើន ខ្ញុំចង់បានអ្វីដែលថ្មីបន្ថែមទៀត»។

«ខ្ញុំចូលព្រះខ័នរាជដោយមានគោលដៅសំខាន់ពីរ។ ទី១ គឺខ្ញុំចង់ប្រកួតប្រជែងថ្មី ពីព្រោះព្រះខ័នរាជស្វាយរៀងជាក្លឹបអាជីពធំ ដូច្នេះមានការប្រកួតប្រជែងខ្ពស់។ ទី២ គឺខ្ញុំចង់ឈ្នះពានរង្វាន់ជាមួយព្រះខ័នរាជស្វាយរៀង»។ ឡុង ភារ៉ាត់ បញ្ជាក់។

ឡុង ភារ៉ាត់ (លេខ១៦) ក្នុងក្រុមជម្រើសជាតិ

បន្ទាប់ពីចូលព្រះខ័នរាជស្វាយរៀង និងបានក្លាយជាសមាជិកសំខាន់មួយរូបជួយឲ្យក្លឹបមានមូលដ្ឋាននៅខេត្តស្វាយរៀងនេះឈរលើកំពូលតារាងនៃលីគកំពូលកម្ពុជារដូវកាល២០២២ ឡុង ភារ៉ាត់ ត្រូវបានកោះហៅចូលក្រុមជម្រើសជាតិកម្ពុជាក្រុមធំដើម្បីចេញទៅប្រកួតពានរង្វាន់ AFC Asian Cup វគ្គសន្សំពិន្ទុក្នុងពូលនៅប្រទេសឥណ្ឌា។ រូបគេក៏បានបង្ហាញប្រកួតជម្រើស១១នាក់ដំបូងនៅលើទីលានដែរ៕

អត្ថបទ៖ វីរបុត្រ