កីឡា

កម្ពុជាឈរលេខ២០ និងលេខ១នៅអាស៊ាន ក្នុងតារាងមេដាយនៅ World Games

បានផុស

២ years មុន

នៅ

ថ្ងៃព្រហស្បតិ៍ ១៤ កក្កដា ២០២២

ដោយ

ប្រទេសកម្ពុជាបានបញ្ជូនកីឡាប៊ូល និងប៉េតង់តែមួយគត់ទៅចូលរួមប្រកួតកីឡាពិភពលោក (World Games) នៅសហរដ្ឋអាមេរិកដោយមានកីឡាការិនីតែ២រូបប៉ុណ្ណោះប្រកួតលើ២វិញ្ញាសា។ ជាលទ្ធផលកីឡាការិនីកម្ពុជាទាំងពីររូបបានជោគជ័យ១០០%។

វីរកីឡាការិនី អ៊ុន ស្រីយ៉ា និង អ៊ុក ស្រីមុំ ឈ្នះមេដាយមាសវិញ្ញាសាគូនារី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិញ្ញាសាទោលវាយយកពិន្ទុ៖ កីឡាការិនី អ៊ុក ស្រីមុំ បានឈ្នះមេដាយមាស បន្ទាប់ពីឈ្នះកីឡាការិនីដាណឺម៉ាក Katrine Junge នៅវគ្គពាក់កណ្តាលផ្តាច់ព្រ័ត្រដោយពិន្ទុ៣៧-២៣ និងវគ្គផ្តាច់ព្រ័ត្រឈ្នះកីឡាការិនីម្ចាស់ផ្ទះអាមេរិក Rebeka Howe ដោយពិន្ទុ៤១-២១។
វិញ្ញាសាគូនារី២ទល់២៖ កីឡាការិនី អ៊ុក ស្រីមុំ និង អ៊ុន ស្រីយ៉ា ចាប់ដៃគ្នាឈ្នះមេដាយមាស បន្ទាប់ពីការប្រកួតសន្សំពិន្ទុក្នុងពូល ប្រកួតទី១ឈ្នះក្រុមនារីដាណឺម៉ាក ១៣-៥, ប្រកួតទី២ ឈ្នះក្រុមនារីបារាំង ៩-៧, ប្រកួតទី៣ឈ្នះដាណឺម៉ាក ១៣-៤ ម្តងទៀត។ ប្រកួតវគ្គពាក់កណ្តាលផ្តាច់ព្រ័ត្រ ក្រុមនារីកម្ពុជាឈ្នះក្រុមនារីថៃ ១២-១០ និងប្រកួតផ្តាច់ព្រ័ត្រឈ្នះក្រុមនារីបារាំង ៧-៥។

វីរកីឡាការិនី អ៊ុក ស្រីមុំ ឈ្នះមេដាយមាសលើវិញ្ញាសាវាយយកពិន្ទុ

បន្ទាប់ពីចប់ការប្រកួតទាំង២វិញ្ញាសាជាមួយនឹងលទ្ធផលឥតខ្ចោះ១០០% កម្ពុជាបានឡើងទៅឈរចំណាត់ថ្នាក់លេខ២០ ក្នុងចំណោមប្រទសចំនួន១១០ដែលបានចូលរួមប្រកួត World Games ឆ្នាំ២០២២នេះ។

បើនិយាយពីប្រទេសតំបន់អាស៊ានវិញ កម្ពុជាឈរចំណាត់ថ្នាក់លេខ១ក្នុងចំណោមប្រទេសឈ្នះមេដាយគិតត្រឹមថ្ងៃទី១៤ ខែកក្កដានេះ បន្ទាប់មកប្រទេសឥណ្ឌូណេស៊ី ឈ្នះមាស១ ប្រាក់២, ព្រុយណេ ឈ្នះមាស១ ប្រាក់១,ហ្វីលីពីន ឈ្នះមាស១, វៀតណាមឈ្នះមាស១, សិង្ហបុរី ឈ្នះប្រាក់១ សំរឹទ្ធ១, ថៃ ឈ្នះសំរឹទ្ធ២ និងម៉ាឡេស៊ី ឈ្នះសំរឹទ្ធ១។

យ៉ាងណា តារាងចំណាត់ថ្នាក់មេដាយនេះនឹងមានការប្រែប្រួល ពីព្រោះការប្រកួតសម្រាប់ព្រឹត្តិការណ៍ទាំងមូលមិនទាន់ចប់ទេ ប៉ុន្តែសម្រាប់កម្ពុជាបានបញ្ចប់ភារកិច្ចរបស់ខ្លួនហើយ៕