កីឡា

កីឡាករ៣នាក់នេះរួមចំណែកសំខាន់ធ្វើឲ្យណាហ្គាវើលដ៍រឹងមាំលើទីលាន

បានផុស

៣ years មុន

នៅ

ថ្ងៃសុក្រ ២២ កក្កដា ២០២២

ដោយ

ព្រះខ័នរាជស្វាយរៀង និង ណាហ្គាវើលដ៍ ត្រូវតទល់គ្នាលើទីលានវាលស្មៅកីឡដ្ឋាន RSN វេលាម៉ោង៣:៤៥នាទីរសៀល ថ្ងៃសៅរ៍ ទី២៣ ខែកក្កដា ក្នុងសប្តាហ៍ទី១២ នៃជម្រើសជើងឯកខេមបូឌានព្រីមៀរលីគ រដូវកាល២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាជំនួបរវាងក្រុមកំពូលតារាងលីគជាមួយក្រុមចំណាត់ថ្នាក់លេខ៣ បន្ទាប់ពី១១សប្តាហ៍កន្លងទៅព្រះខ័នរាជស្វាយរៀង ឈ្នះ៩ប្រកួត និងស្មើ២ប្រកួតពោលគឺមិនទាន់ស្គាល់បរាជ័យឡើយក្នុងរដូវកាលនេះ ខណៈណាហ្គាវើលដ៍ឈ្នះ៥ប្រកួត ស្មើ៣ប្រកួត និងចាញ់៣ប្រកួត។

ណាហ្គាវើលដ៍ត្រូវបានគេមើលឃើញថា ជាក្រុមមួយដែលមានតំបន់ការពាររឹងមាំ និងវាយបកគ្រោះថ្នាក់ ដូច្នេះលោក Conor Nester គ្រូបង្វឹកព្រះខ័នរាជស្វាយរៀងចាត់ការប្រកួតជាមួយណាហ្គាវើលដ៍ជាជំនួបដ៏លំបាកខ្លាំង។

សុះ សូហាណា (ស្តាំ) គួច ដានី (កណ្តាល) និង សុកុម្ភៈ (ឆ្វេង)

លោក Conor បានប្រាប់«កម្ពុជាថ្មី»ថា ៖«វាជាការប្រកួតដ៏លំបាកខ្លាំងសម្រាប់ពួកយើង ពីព្រោះណាហ្គាវើលដ៍ទទួលបានលទ្ធផលល្អជាច្រើនពីការប្រកួតធំៗនៅក្នុងរដូវកាលនេះ»។

គ្រូបង្វឹកសញ្ជាតិអៀរឡង់រូបនេះបានសម្លឹងឃើញសមាជិកបទពិសោធច្រើន និងចាស់វស្សា៣រូបដែលរួមចំណែកដ៏សំខាន់ធ្វើឲ្យណាហ្គាវើលដ៍រឹងមាំនៅលើទីលាន។ លោកបានលើកឡើងថា ៖«ខ្ញុំគិតថា មានហេតុផលចម្បងមួយដែលធ្វើឲ្យណាហ្គាវើលដ៍ក្លាយជាក្រុមពិបាកយកឈ្នះគឺតំបន់បម្រើកណ្តាលរបស់ពួកគេល្អដែលមាន គួច សុកុម្ភៈ, គួច ដានី និង សុះ សូហាណា។ កីឡាករទាំង៣នាក់នេះអាចគ្រប់គ្រងការប្រកួតបានយ៉ាងល្អ ហើយអាចធ្វើឲ្យយើងគ្រោះថ្នាក់នៅពេលពួកគេលេងទម្រង់វាយបក»៕