កីឡា

ឯកឧត្តម ហ៊ុន ម៉ានី មានមោទនភាព និងកក់ក្តៅពេលឃើញស្នាមញញឹមអត្តពលិក

បានផុស

៣ years មុន

នៅ

ថ្ងៃសុក្រ ៥ សីហា ២០២២

ដោយ

ឯកឧត្តម ហ៊ុន ម៉ានី ប្រធានសហភាពសហ័ន្ធយុវជនកម្ពុជា និងជាប្រធានគណៈប្រតិភូកីឡាជនពិការកម្ពុជាមានភាពកក់ក្តៅ និងមោទនភាពដែលបានឃើញផ្ទាល់នូវស្នាមញញឹមរបស់អត្តពលិកកំពុងប្រកួតអាស៊ានប៉ារ៉ាហ្គេម លើកទី១១ ឆ្នាំ២០២២ នៅទីក្រុងសូឡូ ប្រទេសឥណ្ឌូនេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ហ៊ុន ម៉ានី មានប្រសាសន៍ថា៖ «ក្នុងនាមខ្ញុំជាសមាជិកគណៈប្រតិភូមួយរូប ក៏ដូចជាប្រជាពលរដ្ឋខ្មែរមួយរូបពិតជាមានការសាទរ និងមោទនភាពចំពោះអ្វីដែលកីឡាករ កីឡាការិនីរបស់យើងសម្រេចបាននៅទឹកដីសូឡូ ក្នុងការប្រកួតប្រជែងនៅអាស៊ានប៉ារ៉ាហ្គេម លើកទី១១នេះ។ អ្វីដែលជាការខំប្រឹងប្រែង ការត្រៀមខ្លួនរបស់គាត់ តំណាងឲ្យប្រទេសទាំងមូល ទាំងប្រជាពលរដ្ឋ១៧លាន ហើយសម្រេចបាននូវភាពជោគជ័យប៉ុណ្ណេះគឺពិតជាអស្ចារ្យមែនទែន។ ខ្ញុំគ្មានអ្វីក្រៅពីការសាទរ មោទនភាព និងកោតសរសើរចំពោះការប្រឹងប្រែងរបស់ពួកគាត់តំណាងឲ្យប្រទេសជាតិ»។

ឯកឧត្តមបន្តថា៖ «ការពុះពាដើម្បីឈ្នះគឺជាកត្តាមួយ។ ពុះពាដែលបង្ហាញពីការលះបង់នៃសមត្ថភាពរបស់គាត់គឺជាកត្តាមួយថែមទៀត ក៏ប៉ុន្តែពួកគាត់ប្រកួតដោយស្នាមញញឹម។ ដោយមិនមានឃើញ ឬឆ្លុះបញ្ចាំង ឬលេចចេញអ្វីដែលជាពិការភាពរបស់គាត់ទេគឺគាត់ប្រកួតប្រជែងដូចយើងទាំងអស់គ្នា។ ស្មារតីនេះ ឆន្ទៈនេះ ការរស់នៅនេះ និងការពុះពារបស់គាត់នេះ ស្នាមញញឹមរបស់គាត់នេះគឺធ្វើឲ្យខ្ញុំមានភាពកក់ក្តៅមែនទែន»។

«ជាពិសេសជួបជាមួយកីឡាករ កីឡាការិនី បានស្វែងយល់ពីពួកគាត់។ ការត្រៀមខ្លួនទាំងបច្ចេកទេសមុនចូលប្រកួតគឺជាភាពរីករាយ និងមោទនភាពរបស់ខ្ញុំ។ ទាំងអស់នេះគឺជាការបើកបទពិសោធន៍ថ្មីមួយទៀតសម្រាប់ខ្ញុំក្នុងជីវិត។ បើសិនមិនបាននៅជាមួយពួកគាត់ លើកទឹកចិត្តពួកគាត់ កំដពួកគាត់ ទោះលទ្ធផលយ៉ាងណាក៏ដោយ ប្រហែលខ្ញុំមិនបានស្វែងយល់ ស៊ីជម្រៅបន្ថែម ថាតើមានលក្ខណៈពិសេសយ៉ាងណា ដែលយើងត្រូវការយកចិត្តទុកដាក់ដល់ពួកគាត់។ ការគាំទ្រនេះទាំងស្មារតី និងកម្លាំងចិត្តទាំងនៅពេលឈ្នះ ឬចាញ់ ទោះក្នុងកាលៈទេសៈណាដើម្បីឲ្យពួកគាត់មានភាពកក់ក្តៅ យើងត្រូវនៅជាមួយពួកគាត់គ្រប់កាលៈទេសៈ»។ ឯកឧត្តម ហ៊ុន ម៉ានី បានបន្ថែម៕

អត្ថបទ៖ វីរបុត្រ

Related Topics: