កីឡា

កម្ពុជាជាប់ស្វ័យប្រវត្តិជើងឯក AFF Cup 2022 ដែលនឹងចាប់ឆ្នោតចុងខែនេះ

បានផុស

៣ years មុន

នៅ

ថ្ងៃពុធ ១០ សីហា ២០២២

ដោយ

ក្រុមបាល់ទាត់ជម្រើសជាតិកម្ពុជាស្ថិតក្នុងចំណោមជម្រើសជាតិទាំង៩ដែលជាប់ដោយស្វ័យប្រវត្តិក្នុងវគ្គចែកពូលពានរង្វាន់ AFF Cup ខណៈក្រុមបាល់ទាត់ជម្រើសជាតិព្រុយណេ និងទីម័រខាងកើត ត្រូវប្រកួតជម្រុះស្វែងរកមួយក្រុមឡើងទៅវគ្គចែកពូលដើម្បីបង្គ្រប់១០ក្រុម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់បាល់ទាត់លំដាប់ទី១នៅតំបន់អាស៊ាន AFF Mitsubishi Electric Cup ប្រចាំឆ្នាំ២០២២នឹងធ្វើការចាប់ឆ្នោតជាផ្លូវការវេលាម៉ោង៣រសៀល ថ្ងៃទី៣០ ខែសីហា ខាងមុខនេះនៅទីក្រុងបាំងកក ប្រទេសថៃ។

កាលពីមុនពានរង្វាន់នេះមានឈ្មោះ AFF Suzuki Cup ប៉ុន្តែដល់ឆ្នាំ២០២២នេះទទួលបានម្ចាស់ឧបត្ថម្ភថ្មីក៏ដាក់ឈ្មោះតាមម្ចាស់ឧបត្ថម្ភ។ សម្រាប់ឆ្នាំ២០២២គឺជាលើកទី១៤នៃពានរង្វាន់លំដាប់ទី១ប្រចាំតំបន់អាស៊ាន។ ក្រុមចំនួន១០ត្រូវប្រកួតក្នុងវគ្គចែកពូលតាមរូបមន្តប្រកួតក្នុងដី និងក្រៅដី។

ការចាប់ឆ្នោតនឹងត្រូវបែងចែកជាពីរពូល ក្នុងមួយពូលមាន៥ក្រុមដែលក្រុមនីមួយៗត្រូវប៉ះគ្នាពីរដងពោលគឺក្នុងដី និងក្រៅ។ ក្រុមមានពិន្ទុខ្ពស់ជាងគេគឺលេខ១ និងលេខ២នៃពូលនីមួយៗនឹងឡើងទៅវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រដែលប្រកួតក្នុងដី និងក្រៅដីទៀត។

ក្រុម៩ដែលជាប់ដោយស្វ័យប្រវត្តិនៅវគ្គចែកពូលគឺ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម។ ចំណែកក្រុមព្រុយណេ និងទីម័រខាងកើត ត្រូវប្រកួតជម្រុះស្វែងរកមួយក្រុមឡើងទៅវគ្គចែកពូល៕

អត្ថបទ៖ វីរបុត្រ

Related Topics:ក្រុមបាល់ទាត់ជម្រើសជាតិកម្ពុជា