យុវជនព្រះខ័នរាជស្វាយរៀង ម្នាក់គត់មានឈ្មោះក្នុងក្រុមជម្រើសជាតិ U-20 កម្ពុជា

សហព័ន្ធកីឡាបាល់ទាត់កម្ពុជា ថ្មីៗនេះបានធ្វើការកោះហៅកីឡាករចំនួន ២៩នាក់ ដើម្បីចូលរួមហ្វឹកហាត់ ដំណាក់កាលទី១ ត្រៀមប្រកួតវគ្គជម្រុះពានយុវជនអាស៊ីអាយុក្រោម ២០ឆ្នាំ ឬ (AFC U-20 Asian Cup) នៅប្រទេសតាជីគីស្ថាន ខែកញ្ញា ខាងមុខ។

ក្នុងចំណោមកីឡាករ ២៩នាក់ មានមកពីក្លិបចំនួន ១១នៅក្នុងលីគកំពូលកម្ពុជា និងលីគទី២ កម្ពុជា ក្នុងនោះរួមមាន យុវជនសាលាបាល់ទាត់ជាតិបាទី ៨នាក់, ព្រៃវែង ៤នាក់, សូលទីឡូអង្គរ ៣នាក់, គីរីវង់សុខសែនជ័យ ៣នាក់, ភ្នំពេញក្រោន ២នាក់, អាស៊ីអឺរ៉ុបយូណាយធីត ២នាក់, អង្គរថាយហ្គឺរ ២នាក់, វិសាខា ២នាក់, ណាហ្គាវើលដ៍ ១នាក់, កងយោធពលខេមរភូមិន្ទ ១នាក់, និងព្រះខ័នរាជស្វាយរៀង ១នាក់ នោះគឺ ជូ ស៊ិនទី។

យុវជនទាំង ២៩នាក់នេះ នឹងត្រូវហ្វឹកហាត់ ១ថ្ងៃរៀងរាល់សប្ដាហ៍ ដើម្បីជាការផ្សំបញ្ជូលគ្នា រួចទើបចែកជាដំណាក់កាលផ្សេងទៀតដើម្បីជម្រុះកីឡាករនៅសល់ ២៣នាក់ចុងក្រោយ ខណៈកីឡាករដែលជម្រុះក៏នៅមានសិទ្ធិក្នុងនាមជាកីឡាករបញ្ជីបម្រុង បានសេចក្ដិថាអាចកោះហៅវិញនៅពេលក្រោយករណីមានជំងឺកូវីដ-១៩។

ពានយុវជនអាស៊ីអាយុក្រោម ២០ឆ្នាំ (AFC U-20 Asian Cup Qualification ound) គ្រោងធ្វើពីថ្ងៃទី១៤ ដល់ថ្ងៃទី១៨ ខែកញ្ញា ឆ្នាំ២០២២ នៅទឹកដីកណ្ដាលប្រទេសតាជីគីស្ថាន។ ក្រុមជម្រើសជាតិកម្ពុជា អាយុក្រោម ២០ឆ្នាំ ស្ថិតនៅពូល I ជាមួយ តាជីគីស្ថាន, សិង្ហបុរី និងលីបង់។

ដើម្បីបានឡើងទៅវគ្គបន្ត U-20 កម្ពុជា ដាច់ខាតត្រូវតែឈរលេខ១ ក្នុងពូល ជាកៅអីឡើងដោយស្វ័យប្រវត្តិ ខណៈក៏អាចឡើងផងដែរ ក្នុងនាមជាក្រុមលេខ២ល្អ ដោយត្រូវប្រៀបធឿបជាមួយពូលចំនួន ៩ផ្សេងទៀត ហើយយកតែ ៥ក្រុមប៉ុណ្ណោះឡើអទៅជុំផ្ដាច់ព្រ័ត្រ ដែលគេប្រកួតនៅប្រទេសអ៊ូសបីគីស្ថាន នាខែមីនា ឆ្នាំ២០២៣៕

អត្ថបទ៖ មន្នីរ័ត្ន