កីឡា

កម្ពុជានឹងដាក់វិញ្ញាសាច្រើនជាងគេបំផុតក្នុងប្រវត្តិសាស្ត្រស៊ីហ្គេម

បានផុស

២ years មុន

នៅ

ថ្ងៃពុធ ១៧ សីហា ២០២២

ដោយ

កីឡាស៊ីហ្គេម លើកទី៣២ ឆ្នាំ២០២៣ ដែលត្រូវធ្វើលើកដំបូងនៅប្រទេសកម្ពុជានឹងមានវិញ្ញាសាដាក់ឲ្យប្រកួតដណ្តើមមេដាយច្រើនជាងគេបំផុតក្នុងប្រវត្តិសាស្ត្រកីឡាអាស៊ីអាគ្នេយ៍ដែលបានចាប់បដិសន្ធិតាំងពីឆ្នាំ១៩៥៩មក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីម្សិលមិញនេះតាមការឲ្យដឹងពីឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានចូលរួមកិច្ចប្រជុំលេខាធិការដ្ឋានរបស់សហព័ន្ធកីឡាអាស៊ីអាគ្នេយ៍នៅទីក្រុងបាងកក ប្រទេសថៃ លើការសម្រេចវិញ្ញាសាដែលត្រូវដាក់ឲ្យប្រកួតក្នុងស៊ីហ្គេម លើកទី៣២ ឆ្នាំ២០២៣ នៅកម្ពុជា។

ឯកឧត្តមបានបញ្ជាក់ថា កម្ពុជាបានបង្ហាញទៅប្រទេសទាំង១១ដែលបានចូលរួមកិច្ចប្រជុំគឺត្រៀមវិញ្ញាសាជាង៦០០។ វិញ្ញាសាភាគច្រើនទទួលបានការគាំទ្រហើយ និងនៅមានវិញ្ញាសាតិចតួចដែលប្រទេសផ្សេងស្នើឲ្យកម្ពុជាពិចារណាឡើងវិញ។ សូមបញ្ជាក់ថា វិញ្ញាសាជាង៦០០នេះគឺស្ថិតក្នុងកីឡា៣៩ប្រភេទ និងកីឡាសម្តែង១ប្រភេទដែលបានសម្រេចក្នុងកិច្ចប្រជុំនៅកម្ពុជាកាលពីខែកក្កដាកន្លងទៅ។

តាមរយៈវិញ្ញាសាជាង៦០០សម្រាប់ឆ្នាំ២០២៣គឺមានន័យថា ស៊ីហ្គេម លើកដំបូងនៅកម្ពុជាគឺមានវិញ្ញាសាច្រើនជាងគេបំផុតគិតចាប់តាំងពីស៊ីហ្គេមលើកដំបូងឆ្នាំ១៩៥៩រហូតដល់ឆ្នាំ២០២១ (លើកមកឆ្នាំ២០២២)។ រាប់គិតទាំងវិញ្ញាសាដែលប្រទេសធ្វើម្ចាស់ផ្ទះលើកដំបូង ឬប្រទេសដែលមានបទពិសោធធ្វើម្ចាស់ផ្ទះច្រើន ក៏កម្ពុជានៅតែដាក់វិញ្ញាសាច្រើនជាង។