កីឡា

វិញ្ញាសាប្រកួតស៊ីហ្គេមនៅកម្ពុជា កើនដល់ជាង ៦០០ វិញ្ញាសា ក្នុងចំណោម ៣៩ ប្រភេទកីឡា

បានផុស

២ years មុន

នៅ

ថ្ងៃពុធ ១៧ សីហា ២០២២

ដោយ

សហព័ន្ធកីឡាអាស៊ីអាគ្នេយ៍ បានរៀបចំកិច្ចប្រជុំក្របខ័ណ្ឌលេខាធិការដ្ឋាន ដើម្បីត្រួតពិនិត្យវឌ្ឍនភាពការងារ ដំណើរការនៃការរៀបចំ ជាពិសេសទៅលើការសម្រេចដាក់វិញ្ញាសាប្រកួត ក្នុងព្រឹត្តិការណ៍កីឡាស៊ីហ្គេម លើកទី ៣២ ឆ្នាំ ២០២៣ នៅកម្ពុជា នៅថ្ងៃទី ១៦ ខែសីហា ឆ្នាំ ២០២២ នៃទីក្រុងបាងកក ប្រទេសថៃ ខណៈប្រតិភូកម្ពុជា ត្រូវបានដឹកនាំដោយឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី ៣២ ឆ្នាំ ២០២៣ (CAMSOC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយកិច្ចប្រជុំ ឯកឧត្តមបានមានប្រសាសន៍ថា៖ «យើងបានបង្ហាញទៅគ្រប់ប្រទេសអំពីការត្រៀមប្រភេទវិញ្ញាសាជាង ៦០០ ក្នុងវិញ្ញាសាទាំងអស់ហ្នឹង គឺមានការជជែកវែកញែកគ្នា ក្នុងនោះវិញ្ញាសាភាគច្រើន បានទទួលការគាំទ្រពីបណ្ដាប្រទេសទាំងអស់ ហើយនៅមានវិញ្ញាសាតិចតួចទេ ដែលគេស្នើសុំឲ្យយើងមានការពិចារណាឡើងវិញ។ អ៊ីចឹងក្នុងនាមជាម្ចាស់ផ្ទះ យើងបានយកសំណូមពររបស់គេ មកធ្វើការជាមួយសហព័ន្ធកីឡាជាតិរបស់យើងឡើងវិញមួយចំនួន ។ នេះហើយជាអ្វីដែលយើងបានខិតខំប្រឹងប្រែង ដើម្បីធ្វើការតស៊ូមតិបន្ដ តែវឌ្ឍនភាពរបស់យើង បានដើរទៅមុខយ៉ាងរលូន ព្រោះយើងបានសុំឲ្យប្រទេសទាំងអស់ គាំទ្រកម្ពុជា និងជួយកម្ពុជា ឲ្យធ្វើការប្រកួតទទួលបានជោគជ័យ ហើយប្រទេសទាំងអស់ បានសន្យានឹងជួយដល់កម្ពុជា ដែលខិតខំប្រឹងប្រែងក្នុងការធ្វើម្ចាស់ផ្ទះលើកដំបូងនេះ ឲ្យបានជោគជ័យ» ។

«ចំណុចមួយទៀត គឺការរៀបចំឲ្យមានការលក់សិទ្ធទូរទស្សន៍ ត្រូវបានប្រទេសទាំងអស់ ចាត់ទុកជាគឺជារបត់នៃការផ្លាស់ប្ដូរមួយដ៏សំខាន់ ក្នុងប្រវត្តិរបស់ស៊ីហ្គេម ដែលមានតែកម្ពុជាទេ ដែលអាចធ្វើជាគំរូក្នុងការលក់សិទ្ធទូរទស្សន៍នេះ ដើម្បីឲ្យស៊ីហ្គេមបន្ដៗទៀត យកជាមេរៀនបទពិសោធន៍ ទាំងការផលិតឲ្យមានគុណភាព និងការផ្ដល់នូវតម្លាភាព នៃការចែករំលែកភាគលាភ នៃការលក់សិទ្ធទូរទស្សន៍ ចំពោះស៊ីហ្គេមនៅកម្ពុជា ។

ចឹងការវាយតម្លៃចុងក្រោយ ក្នុងនាមយើងជាម្ចាស់ផ្ទះ យើងបានជោគជ័យក្នុងកិច្ចប្រជុំនេះ ដែលជាកិច្ចប្រជុំមួយទទួលបាននូវសុទិដ្ឋិនិយមច្រើន នៅក្នុងការលើកទឹកចិត្តឲ្យម្ចាស់ផ្ទះរៀបចំឲ្យទទួលបានជោគជ័យ សម្រាប់ស៊ីហ្គេម ឆ្នាំ ២០២៣»។ ប្រសានស៍ឯកឧត្តម វ៉ាត់ ចំរើន។

សូមរំឮកជាថ្មីថា ស៊ីហ្គេម ឆ្នាំ ២០២៣ គ្រោងនឹងធ្វើពីថ្ងៃទី ០៥ ដល់ថ្ងៃទី ១៦ ខែឧសភា ឆ្នាំ ២០២៣ ដោយមានកីឡាចំនួន ៣៩ ប្រភេទដែលអនុម័តឱ្យប្រកួតជាផ្លូវការ ស្របពេលដែលវិញ្ញាសា គិតមកទល់ពេលនេះបានកើនដល់ជាង ៦០០ វិញ្ញាសា ខណៈដើមឡើយគម្រោងតែជាង ៥០០ វិញ្ញាសាប៉ុណ្ណោះ៕