កីឡាករព្រះខ័នរាជស្វាយរៀង បន្តមានឈ្មោះជាមួយ U-20 កម្ពុជា ក្នុងការធ្វើតេស្តដំណាក់កាលទី ២

កីឡាកររបស់ក្លិបព្រះខ័នរាជស្វាយរៀង ជូ ស៊ិនទី បន្តមានឈ្មោះចូលរួមហ្វឹកហាត់ ដំណាក់កាលទី ២ ត្រៀមប្រកួតវគ្គជម្រុះពានយុវជនអាស៊ីអាយុក្រោម ២០ ឆ្នាំ ឬ (AFC U-20 Asian Cup) នៅ​ប្រទេស​តាជី​គី​ស្ថាន ខែកញ្ញា ខាងមុខ បន្ទាប់ពី​ឆ្លង​ផុត​ដំណាក់កាល​ទី​ ២​។​

​ក្នុងចំណោម​កីឡាករ ២៩​ នាក់ មាន​មកពី​ក្លិប​ចំនួន ១១ ​នៅក្នុង​លី​គ​កំពូល​កម្ពុជា និង​លី​គ​ទី​ ២ កម្ពុជា កាលពី​សប្ដាហ៍​មុន​បាន​ជម្រុះ​កីឡាករ ៣ ​នាក់​ចេញ ដោយ​បច្ចុប្បន្ន​ក្នុងដំណាក់កាល​ទី​ ២ នេះ​នៅសល់ ២៦​ នាក់ ហើយ ជូ ស៊ិន​ទី នៅតែ​បន្ត​មានឈ្មោះ​ចូលរួម​ហ្វឹកហាត់ ដំណាក់កាល​ទី ​២ រួមជាមួយ យុវជន​សាលា​បាល់ទាត់​ជាតិ​បាទី ៨ ​នាក់​, ព្រៃវែង ៤​ នាក់​, សូល​ទី​ឡូ​អង្គរ ៣​ នាក់​, ភ្នំពេញ​ក្រោ​ន ២ ​នាក់​, អាស៊ី​អឺរ៉ុប​យូ​ណាយ​ធី​ត ២ ​នាក់​, អង្គ​រថា​យ​ហ្គឺ​រ ១ ​នាក់​, វិសាខា ២​ នាក់​, ណាហ្គា​វើ​លដ៍ ១ ​នាក់​, កងយោធពល​ខេមរភូមិន្ទ ១ ​នាក់​, និង​គីរីវង់​សុខ​សែន​ជ័យ ១ ​នាក់​។​

​យុវជន​ទាំង ២៦ ​នាក់​នេះ នឹងត្រូវ​ហ្វឹកហាត់ ចំនួន​ ២​ លើក​ទៀត ធ្វើឡើង​តែ​ ១ ​ដង​ក្នុង​មួយ​សប្ដាហ៍ ដើម្បី​ជម្រុះ​កីឡាករ​នៅសល់ ២៣​ នាក់​ចុងក្រោយ​។ ដោយសារ​មានឈ្មោះ​លេង​ជា​ញឹកញាប់​ក្នុង​លី​គ ក៏ដូចជា​ត្រូវ​ប្រកួត​ក្នុង​ពានរង្វាន់​សម្តេច​តេ​ជោ ហ៊ុន សែន កីឡាករ ជូ ស៊ិន​ទី ទទួលបាន​ការអនុញ្ញាត​ឱ្យ​បន្ត​ហ្វឹកហាត់ និង​ប្រកួត​ជាមួយ​ក្លិប​ជាធម្មតា​។​

​សូមបញ្ជាក់ថា ពាន​យុវជន​អាស៊ី​អាយុ​ក្រោម ២០ ​ឆ្នាំ (AFC U-20 Asian Cup Qualification Round) គ្រោង​ធ្វើ​ពីថ្ងៃ​ទី​ ១៤ ដល់​ថ្ងៃទី​ ១៨ ខែកញ្ញា ឆ្នាំ​ ២០២២ នៅ​ទឹកដី​កណ្ដាល​ប្រទេស​តាជី​គី​ស្ថាន​។ ក្រុ​ជម្រើសជាតិ​កម្ពុជា អាយុ​ក្រោម ២០ ​ឆ្នាំ ស្ថិតនៅ​ពូ​ល I ជាមួយ តាជី​គី​ស្ថាន​, សិង្ហ​បុរី និង​លី​បង់​។​

​ដើម្បី​បាន​ឡើងទៅ​វគ្គ​បន្ត U-20 កម្ពុជា ដាច់ខាត​ត្រូវតែ​ឈរ​លេខ​ ១ ក្នុង​ពូ​ល ជា​កៅអី​ឡើង​ដោយ​ស្វ័យប្រវត្តិ ខណៈ​ក៏​អាច​ឡើង​ផងដែរ ក្នុងនាម​ជា​ក្រុម​លេខ​ ២ ​ល្អ ដោយ​ត្រូវ​ប្រៀបធៀប​ជាមួយ​ពូ​ល​ចំនួន ៩​ ផ្សេងទៀត ហើយ​យកតែ ៥ ​ក្រុម​ប៉ុណ្ណោះ​ឡើ​អ​ទៅ​ជុំ​ផ្ដាច់ព្រ័ត្រ ដែល​គេ​ប្រកួត​នៅ​ប្រទេស​អ៊ូ​ស​បី​គី​ស្ថាន នា​ខែមីនា ឆ្នាំ​ ២០២៣៕

​អត្ថបទ​៖ មន្នី​រ័ត្ន​