រំលង១០ថ្ងៃ បាល់ទាត់ឥណ្ឌា បានរួចផុតពីការដាក់បម្រាមរបស់ FIFA វិញ

សហព័ន្ធកីឡាបាល់ទាត់ពិភពលោក FIFA បានសម្រេចដកបម្រាម សហព័ន្ធកីឡាបាល់ទាត់ឥណ្ឌា និងឱ្យត្រលប់មកមានសកម្មភាពបាល់ទាត់វិញ ក្រោយជាប់បម្រាមជាង១០ថ្ងៃ កាលពីល្ងាចថ្ងៃចន្ទ (១៥ សីហា) ដោយសារឥទ្ធិពលនៃការលូកដៃចូលហួសហេតុពីភាគីទី៣។

ការសម្រេចចិត្តនេះ បន្ទាប់ពីតុលាការកំពូលបានទទួលការបញ្ជាក់ថា អាណត្តិនៃគណៈកម្មាធិការគ្រប់គ្រងដែលត្រូវបានបង្កើតឡើង ដើម្បីទទួលយកអំណាចរបស់គណៈកម្មាធិការប្រតិបត្តិរបស់ AIFF ត្រូវបានបញ្ចប់ ហើយថា រដ្ឋបាលរបស់ AIFF បានគ្រប់គ្រងឡើងវិញទាំងស្រុងនូវកិច្ចការប្រចាំថ្ងៃរបស់ AIFF ។ (AIFF សហព័ន្ធកីឡាបាល់ទាត់ឥណ្ឌា)។

ការហាមប្រាមពីស្ថាប័នកំពូលនៃបាល់ទាត់ពិភពលោក FIFA ត្រូវបានដាក់លើប្រទេសឥណ្ឌា នៅថ្ងៃទី១៥ ខែសីហា ឆ្នាំ២០២២។ នេះបានកើតឡើងជាចម្បងដោយសារតែការជ្រៀតជ្រែកពីភាគីទីបី នៅក្នុងកិច្ចការប្រចាំថ្ងៃរបស់ AIFF ។ លើសពីនេះ បើយោងតាមលក្ខន្តិកៈរបស់ FIFA វត្តមានរបស់កីឡាករបាល់ទាត់ល្បីៗនៅក្នុងគណៈកម្មាធិការ មិនត្រូវបានអនុញ្ញាតទេ លុះត្រាតែពួកគេត្រូវបានជ្រើសរើសរួមគ្នា។

FIFA និង AFC នឹងបន្តតាមដានស្ថានការណ៍ ហើយនឹងគាំទ្រ AIFF ក្នុងការរៀបចំការបោះឆ្នោតរបស់ខ្លួនឱ្យទាន់ពេលវេលា។

ការលើកលែងនេះបានន័យថា សកម្មភាពរបស់ AIFF អាចចូលរួមប្រកួត AFC Asian Cup 2023 វិញបានហើយ។ ម្យ៉ាងវិញទៀត ការប្រកួតមិត្តភាពជាមួយវៀតណាម ក្នុងថ្ងៃ FIFA ក៏អាចចូលរួមបាន ហើយសម្រាប់ ជើងឯកលីគ ក៏អាចចូលរួមប្រកួតជាមួយក្រុមផ្សេងទៀតក្នុងព្រឹត្តិការណ៍ AFC Championship បានវិញផងដែរ ជាពិសេសគឺការប្រកួតជើងឯកនារីពិភពលោក អាយុក្រោម១៧ឆ្នាំ (FIFA U-17 Women’s World Cup 2022™) គ្រោងធ្វើឡើងនៅថ្ងៃទី ១១-៣០ ខែតុលា ឆ្នាំ២០២២ នៅប្រទេសឥណ្ឌា នឹងបន្តតាមការគ្រោងទុក៕

ប្រភព៖ khelnow.com

អត្ថបទ៖ មន្នីរ័ត្ន