កីឡា

ការងារបដិសណ្ឋារកិច្ចរៀបចំរួចរាល់សម្រាប់ស៊ីហ្គេម២០២៣នៅតែការអនុវត្ត

បានផុស

២ years មុន

នៅ

ថ្ងៃសុក្រ ២ កញ្ញា ២០២២

ដោយ

គណៈកម្មការពិធីការ និងបដិសណ្ឋារកិច្ចរបស់គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានរៀបចំការងាររបស់ខ្លួនស្ទើររួចរាល់ទាំងស្រុង និងរង់ចាំតែការអនុវត្តប៉ុណ្ណោះ។

កាលពីព្រឹកថ្ងៃសុក្រ ទី២ ខែកញ្ញានេះ គណៈកម្មាធិការជាតិ CAMSOC បានរៀបចំកិច្ចប្រជុំអចិន្ត្រៃយ៍អំពីការងាររបស់គណៈកម្មការជំនាញ និងបដិសណ្ឋារកិច្ច ក្រោមវត្តមានឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធាន CAMSOC នៅគណៈកម្មាធិការជាតិអូឡាំពិកកម្ពុជា (NOCC)។ កិច្ចប្រជុំនេះផ្តោតសំខាន់លើតួនាទី ភារកិច្ច និងរបៀបរបបការងាររបស់ពិធីការ និងបដិសណ្ឋារកិច្ច ពីព្រោះពិធីការជាអ្នកនាំមុខគេក្នុងការជួប និងទទួលភ្ញៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម វ៉ាត់ ចំរើន អគ្គលេខាធិការ CAMSOC បានប្រាប់ថា ដើម្បីស្របតាមអនុសាសន៍ដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រីថា ការឈ្នះ ចាញ់ជារឿងមួយ ប៉ុន្តែអ្វីដែលសំខាន់ក្នុងនាមជាម្ចាស់ផ្ទះត្រូវធ្វើបដិសណ្ឋារកិច្ច និងទទួលរៀបចំការទទួលភ្ញៀវប្រកបដោយកិត្តិយស និងសេចក្តីថ្លៃថ្នូរ។ ដូច្នេះកិច្ចប្រជុំបានផ្តោតលើអនុសាសន៍ណែនាំដ៏ខ្ពង់ខ្ពស់នេះ និងបានពង្រឹងសមត្ថភាពការងាររបស់គណៈកម្មការពិធីការ។

កិច្ចប្រជុំបានឯកភាពគ្នាលើគោលការណ៍រួមថា តើភារកិច្ច តួនាទី និងការងារអ្វីខ្លះដែលដែលទទួលខុសត្រូវផ្ទាល់របស់គណៈកម្មការពិធីការ និងបដិសណ្ឋារកិច្ច ហើយការងារអ្វីដែលត្រូវសហការជាមួយគណៈកម្មការផ្សេងៗទៀត។ ភារកិច្ចសំខាន់បំផុតគឺការទទួលភ្ញៀវត្រូវមានរបៀបវារៈត្រឹមត្រូវ ពិធីការច្បាស់លាស់ និងមានលក្ខណៈពិសេសស្របតាមពិធីការកីឡា និងពិធីការជាតិ។

ឯកឧត្តមមានប្រសាសន៍ថា ៖««ការបែងចែកតួនាទី ភារកិច្ច និងការទទួលខុសត្រូវនេះបានធ្វើឲ្យគណៈកម្មការទាំងអស់ត្រៀមលក្ខណៈធ្វើផែនការលំអិត មានភារកិច្ចហើយ ធ្វើផែនការលំអិត លើកជាគម្រោង។ អ្វីដែលនៅសេសសល់គឺបានសម្រេចនៅក្នុងអង្គប្រជុំភាគច្រើនហើយ នៅតែការទទួល និងអនុវត្តតែប៉ុណ្ណោះ ពីព្រោះផែនការមាន តួនាទីភារកិច្ចមានអស់ហើយ ថ្ងៃណាធ្វើអ្វី ពេលណាធ្វើអ្វី។ កាលវិភាគ កាលបរិច្ឆេទ មុខងារការងារមានអស់ហើយ ដូច្នេះអ្វីដែលសំខាន់នៅតែការអនុវត្តតែប៉ុណ្ណោះ»៕

ព្រឹត្តិការណ៍ស៊ីហ្គេម លើកទី៣២ ដែលជាប្រវត្តិសាស្ត្រលើកដំបូងនៅប្រទេសកម្ពុជាគ្រោងនឹងបើកជាផ្លូវការនៅថ្ងៃទី៥ ខែឧសភា និងបិទបញ្ចប់នៅថ្ងៃទី១៦ ខែឧសភា ឆ្នាំ២០២៣៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣