កីឡា

វិញ្ញាសា E-Sports ២នេះ កម្ពុជាអាចឈ្នះមេដាយមាសទាំងពីរនៅស៊ីហ្គេម២០២៣

បានផុស

២ years មុន

នៅ

ថ្ងៃព្រហស្បតិ៍ ៨ កញ្ញា ២០២២

ដោយ

សហព័ន្ធកីឡាអេឡិចត្រូនិកកម្ពុជាបានប្រកាសវិញ្ញាសា៩ជាផ្លូវការសម្រាប់ត្រៀមប្រកួតកីឡាស៊ីហ្គេម លើកទី៣២ ឆ្នាំ២០២៣ ដែលប្រទេសកម្ពុជាទទួលរៀបចំធ្វើម្ចាស់ផ្ទះជាលើកដំបូងក្នុងប្រវត្តិសាស្ត្រ។

សម្រាប់វិញ្ញាសាទាំង៩នេះចេញពីប្រភេទអេឡិចត្រូនិកចំនួន៥គឺ AK2 (PC) មាន២វិញ្ញាសា (ក្រុម និងឯកត្តជន), BUBG Mobile (PC) មាន២វិញ្ញាសា (ក្រុម និងឯកត្តជន), Mobile Legends: Bang Bang មាន២វិញ្ញាសា (ក្រុមបុរស និងក្រុមនារី), League of Legends: Wild Rift (Mobile) មាន២វិញ្ញាសា (ក្រុមបុរស និងក្រុមនារី និង Cross Fire (PC) មាន១វិញ្ញាសា (ក្រុមបុរស)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្វីដែលគួរឲ្យចាប់អារម្មណ៍បំផុតនោះគឺ AK2 ដែលជាប្រភេទកីឡាអេឡិចត្រូនិកក្នុងស្រុក និងលេចធ្លោជាងគេរាល់ការប្រកួតលក្ខណៈអន្តរជាតិ។ ប្រភេទកីឡានេះត្រូវបានរៀបចំជារៀងរាល់ឆ្នាំដែលមានពានរង្វាន់ឈ្មោះ MATIC ដែលមានប្រទេសចិន ម៉ាឡេស៊ី ថៃជាដើមចូលរួមការប្រកួត។ សម្រាប់ក្រុមកីឡាករ AK2 កម្ពុជាតែងតែធ្វើបានល្អ និងឈ្នះជើងឯកជាញឹកញាប់។

ទោះជាយ៉ាងណា AK2 នេះហាក់ដូចជាមានការថយចុះក្នុងការលេងនៅប្រទេសមួយចំនួន ប៉ុន្តែកម្ពុជានៅតែពេញនិយម និងមានសកម្មភាពប្រកួតលក្ខណៈលីគជារៀងរាល់ឆ្នាំ។ ដូច្នេះសម្រាប់សហព័ន្ធកីឡាអេឡិចត្រូនិកកម្ពុជាដាក់ប្រភេទកីឡានេះជាផ្លូវការគឺសង្ឃឹមច្រើនមែនទែនក្នុងការឈ្នះមេដាយមាស ហើយអាចឈ្នះបានមេដាយមាសទាំងពីរវិញ្ញាសាទៀតផង។

ចំណែកប្រភេទកីឡាអេឡិចត្រូនិក៤ផ្សេងទៀត កម្ពុជាមិនសូវខ្លាំងប៉ុន្មានទេ។ កាលពីម្សិលមិញនេះ គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC) បានចុះអនុស្សរណៈនៃការយោគយល់គ្នាជាមួយភាគីវៀតណាមដើម្បីរៀបចំការប្រកួត Esports នៅកម្ពុជា ដូច្នេះមានន័យថា ភាគីវៀតណាមនឹងជួយកម្ពុជាក្នុងការរៀបចំប្រភេទកីឡា Esports ណាដែលកម្ពុជាមិនសូវមានបទពិសោធក្នុងការរៀបចំ៕