អត្តពលិក​១៦១​នាក់​ទៅ​ហាត់​នៅ​ចិន​រយៈ​ពេល​យូរ​គឺ​ជា​បេសកកម្ម​​ធំ​បំផុត​

ក្រុម​គ្រូ​បង្វឹក ​ថ្នាក់​ដឹក​នាំ និង​អត្តពលិក​ ជម្រើសជាតិកម្ពុជាសរុប ១៦១នាក់ លើ១២ប្រភេទកីឡា​​បាន​ជួប​ថ្នាក់​ដឹក​នាំ​នា​ព្រឹក​ថ្ងៃ​ទី​១៣ ខែ​កញ្ញា​នេះ​មុន​ពេល​ដំណើរ​ទៅ​ហ្វឹក​ហាត់​រយៈ​ពេល​យូរ​នៅ​ប្រទេស​ចិន​ដើ​ម្បី​ត្រៀម​ខ្លួន​សម្រាប់​ស៊ីហ្គេម លើកទី៣២ ឆ្នាំ២០២៣។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា និងជាអគ្គលេខាធិការ​​ដែល​បាន​សំណេះ​សំណាល​ជា​មួយ​ក្រុម​អត្តពលិក​បាន​ចាត់​ទុក​ការ​ទៅ​ហ្វឹក​ហាត់​នៅ​ប្រទេស​ចិន​គឺ​ជា​បេសកកម្ម​យ៉ាង​ពិសេស​បំផុត​​ ដោយសារ​ពួក​គាត់​ទាំង​អស់​តំណាង​ឲ្យ​ជាតិ។ ជា​មួយ​គ្នា​នេះ ឯកឧត្តមអគ្គលេខាធិការបានផ្តល់ការណែនាំដល់ក្រុមជម្រើសជាតិ​ទាំង​១២ប្រភេទកីឡាត្រូវខិតខំហ្វឹកហាត់តាមកម្មវិធីឲ្យបានគត់មត់ ដើម្បីឆ្ពោះទៅព្រឹត្តិការណ៍ជាប្រវត្តិសាស្ត្រដំបូងនៅកម្ពុជា ស៊ីហ្គេម ២០២៣។

ឯក​ឧត្តម វ៉ាត់ ចំរើន មាន​ប្រសាសន៍​ថា ៖«សូមកីឡាករ កីឡាការិនីទាំងអស់ត្រូវយកអស់ស្មារតី កម្លាំងកាយ កម្លាំងចិត្តខិតខំហ្វឹកហាត់ឲ្យបានមុតមាំបំផុត ដើម្បីស្រូបទាញមកវិញនូវសិទ្ធផល គុណផលកីឡាកម្រិតខ្ពស់។ រាជរដ្ឋាភិបាលកម្ពុជា និងរដ្ឋាភិបាលចិនបានជួយឧបត្ថម្ភគាំទ្រយ៉ាងពេញទំហឹងដល់វិស័យកីឡាកម្ពុជាទាំងមូល ហើយយើងទាំងអស់គ្នាត្រូវតែខិតខំប្តេជ្ញាចិត្តឲ្យបានខ្ពស់បំផុត និងចាត់ទុកថា នេះជាបេសកកម្មពិសេស ឆ្ពោះទៅព្រឹត្តិការណ៍ស៊ីហ្គេម ២០២៣»។

នៅ​អំឡុង​ពេលហ្វឹកហាត់ អត្តពលិក​ទាំង​អស់​ត្រូវ​​រៀបចំខ្លួនឲ្យបានល្អ ក្នុងការកសាងមិត្តភាពជាមួយគ្រូបង្វឹក កីឡាករ កីឡការិនីចិន និងប្រជាជនចិន ដែលពួកគាត់នឹងចែករំលែកចំណេះជំនាញដល់ការហ្វឹកហាត់ដ៏មានសារ​សំខាន់នេះ។ ក្នុងពេលហ្វឹកហាត់នេះ សំខាន់បំផុតគឺត្រូវត្រៀមខ្លួនសម្រាប់ទទួលយកនូវការលំបាក ការតស៊ូ ការប៉ះ​ទង្គិច​នានា ដែលនឹងកើតមានឡើងក្នុងពេលហ្វឹកហាត់។ ជាពិសេសគឺត្រូវគោរពឲ្យបានជាដាច់ខាតនូវពេល​វេលា​ហ្វឹកហាត់ វិន័យ ក្រមសីលធម៌ សេចក្តីថ្លែថ្នូរជាតិឲ្យបាន ពីព្រោះការចេញទៅហ្វឹកហាត់នេះ គឺក្រុមជម្រើសជាតិទាំងអស់ទៅក្នុងនាមជាតិទាំងមូល ទៅក្នុងនាមកិច្ចសហប្រតិបត្តិការនៃប្រទេសទាំងពីរកម្ពុជា-ចិន ក្នុងកម្រិតរដ្ឋាភិលបាលនៃប្រទេសទាំងពីរ ដើម្បីឆ្ពោះទៅធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣ឲ្យទទួលបានជោគជ័យជាប្រវត្តិសាស្ត្រ។

កីឡា​ទាំង​១២ប្រភេទ​នោះ​គឺ ប្រតិភូដឹកនាំ ២នាក់, កាយសម្ព័ន្ធ (១១នាក់), យូដូ (៥នាក់), វូស៊ូ (១០នាក់), បាល់បោះ (១៥នាក់), វាយកូនឃ្លីលើតុ (១០​នាក់), អត្តពលកម្ម (២០នាក់), ចំបាប់ (១៥នាក់), វាយសី (១២នាក់), ហែលទឹក (១១នាក់), លើកទម្ងន់ (១០នាក់), បាល់ទាត់-នារី (២៥នាក់) និងបាល់ទះ (១៥នាក់)។ ពួក​គាត់​នឹង​ចេញ​ដំណើរ​នៅ​ថ្ងៃ​ទី​១៥ ខែ​កញ្ញា​នេះ និង​ធ្វើហាត់រហូតដល់ស៊ីហ្គេម ឆ្នាំ២០២៣ ទើប​ត្រឡប់​មក​កម្ពុជា​វិញ។ ក្រោយពីការប្រកួតស៊ីហ្គេម ២០២៣ បញ្ចប់ កីឡាករ កីឡាការិនីកម្ពុជា នឹងត្រលប់ទៅហ្វឹកហាត់​នៅ​ប្រទេស​ចិន​បន្តទៀត ដើម្បីបង្រ្គប់កិច្ចសន្យាជំនួយឥតសំណងដែលមានរយៈពេល ២ឆ្នាំ៕

អត្ថបទ៖ វីរបុត្រ