កីឡា

ជាបឋម CAMSOC យកផែនការ B ក្នុង«ភូមិកីឡា»សម្រាប់ស៊ីហ្គេម២០២៣

បានផុស

២ years មុន

នៅ

ថ្ងៃព្រហស្បតិ៍ ១៥ កញ្ញា ២០២២

ដោយ

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (ស៊ីហ្គេម) លើកទី៣២ ឆ្នាំ២០២៣ (CAMSOC) បានសម្រេចជាបឋមក្នុងការជ្រើសរើសយកផែនការ B នៅភូមិកីឡា (Sport Village) សម្រាប់រៀបចំកីឡាស៊ីហ្គេម លើកដំបូង នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី១៥ ខែកញ្ញា នេះគណៈកម្មាធិការជាតិ CAMSOC បានរៀបចំកិច្ចប្រជុំស្តីពីការត្រួតពិនិត្យទីកន្លែងអង្គុយរបស់គណៈអធិបតី ទីកន្លែងស្នាក់នៅ អាហារ និងច្រកសុវត្ថិភាពជាដើមក្រោមអធិបតីភាពឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC នៅពហុកីឡដ្ឋានជាតិមរតកតេជោ។

ក្រោយកិច្ចប្រជុំឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និង CAMSOC បានប្រាប់អ្នកសារព័ត៌មានថា ៖«ឥឡូវនេះការកសាងភូមិកីឡា យើងឃើញមានភាពវិជ្ជមានច្រើន ថាតែយើងជ្រើសរើសផែនការ A ឬផែនការ B។ ផែនការ A យើងជ្រើសរើសជាង៤០០០គ្រែសម្រាប់ការស្នាក់នៅក្នុងភូមិកីឡាជាប់នឹងពហុកីឡដ្ឋានជាតិមរតកតេជោ។ ផែនការ B យើងអាចយកតែ៣៧០០គ្រែ ដែលចំនួននេះយើងអាចមានភាពជាក់លាក់ ហើយជាការសម្រេចចិត្តមួយ ប្រសិនបើក្នុងករណីចំនួន៤០០០គ្រែជាងមិនបានសម្រេច»។

«អីចឹងយើងបានសម្រេចយកផែនការ B ជាគោល គឺផែនការ យក៣៧០០គ្រែ ក្នុងការស្នាក់នៅក្នុងភូមិកីឡា។ ចំនួន៣៧០០គ្រែនេះគ្រប់គ្រាន់ក្នុងដំណើរការនៃការផ្លាស់គ្នាចុះឡើងរបស់កីឡាករ កីឡាការិនី ប្រតិភូប្រមាណ៩០០០នាក់អាចចេញចូលបាន»។ ឯកឧត្តម វ៉ាត់ ចំរើន បានបញ្ជាក់។

ឯកឧត្តមបន្ថែមថា នេះជាអ្វីដែលឯកឧត្តម ថោន ខុន បានណែនាំឲ្យគ្រប់ភាគីទាំងអស់ ទាំងភាគីសាងសង់ភូមិកីឡា គណៈកម្មការជំនាញខាងផ្នែកគ្រប់គ្រងការស្នាក់នៅ ហូបចុច ត្រូវត្រួតពិនិត្យ តាមដាន វាយតម្លៃ គ្រប់ពេលវេលាទាំងអស់។

គិតមកដល់ពេលនេះ នៅសល់ប្រមាណ៨ខែទៀតប៉ុណ្ណោះ មហាព្រឹត្តិការណ៍កីឡាស៊ីហ្គេម លើកដំបូងនៅលើទឹកដីកម្ពុជានឹងចូលមកដល់ដោយពិធីបើកជាផ្លូវការធ្វើនៅថ្ងៃទី៥ ខែឧសភា និងបិទបញ្ចប់នៅថ្ងៃទី១៦ ខែឧសភា ឆ្នាំ២០២៣៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣