កីឡា

គ្រូបង្វឹកកម្ពុជាថា U-23 ជប៉ុនជាក្រុមខ្លាំង ទោះភាគច្រើនមកពីក្រុមសាកលវិទ្យាល័យ

បានផុស

២ years មុន

នៅ

ថ្ងៃចន្ទ ១៩ កញ្ញា ២០២២

ដោយ

នៅព្រឹកថ្ងៃទី ១៩ ខែកញ្ញា ឆ្នាំ ២០២២ លោក Ryu Hirose គ្រូបង្វឹកនៃក្រុមជម្រើសជាតិកម្ពុជា អាយុក្រោម ២៣ ឆ្នាំ បានចូលរួមក្នុងសន្និសីទសារព័ត៌មានមុនការប្រកួតមិត្តភាពទល់នឹង U-23 ជប៉ុន។

ថ្លែងក្នុងសន្និសីទសារព័ត៌មាន លោក Ryu Hirose បានលើកឡើងថាជាឱកាសដ៏ល្អ ដើម្បីប្រកួតទល់នឹងក្រុមជប៉ុន បើទោះបីដឹងថាក្រុមនេះភាគច្រើនមានកីឡាករមកពីសាកលវិទ្យាល័យក៏ដោយ ប៉ុន្តែក្រុមបាល់ទាត់សាកលវិទ្យាល័យជប៉ុន គឺមានកម្រិតខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Ryu Hirose បានលើកឡើងយ៉ាងដូច្នេះថា៖ «យើងគិតថាការប្រកួតនេះ គឺជាឱកាសដ៏ល្អ ដើម្បីប្រកួតប្រជែងថា យើងធ្វើបានកម្រិតណាទល់នឹងក្រុមជប៉ុន ដែលស្ថិតនៅជំនាន់ដូចយើង នេះក៏ជាការត្រៀមដ៏ល្អសម្រាប់ការប្រកួតបន្ទាប់ទៀត ពីការត្រៀមបានកម្រិតណា»។

«ខ្ញុំចង់និយាយពីក្រុមជប៉ុនលើកនេះ កីឡាករទាំងអស់មកពីក្រុមសាកលវិទ្យាល័យ ប៉ុន្តែក្រុមបាល់ទាត់សាកលវិទ្យាល័យជប៉ុន គឺមានកម្រិតខ្ពស់ ហើយកីឡាករមួយចំនួនធំកំពុងត្រៀមខ្លួនចូលក្រុមនៃលីគបាល់ទាត់ជប៉ុន ដូច្នេះក្នុងក្រុមទាំងមូលយើងត្រូវតែផ្លាស់ប្ដូរការគិតរបស់យើង វានឹងមិនមែនជាការប្រកួតងាយស្រួលឡើយដូចដែលប្រជាជនកម្ពុជារំពឹងនោះទេ អ៊ីចឹងយើងនឹងព្យាយាមឲ្យអស់ពីលទ្ធភាព»។

លោកក៏បានបន្ថែមឲ្យដឹងទៀតពីការត្រៀមខ្លួនរបស់ក្រុម គឺធ្វើបានល្អ ប៉ុន្តែមិនមានអារម្មណ៍ថាជាការប្រកួតដ៏ងាយស្រួលឡើយ ជាពិសេសក្រុម U-23 ជប៉ុន ទើបតែលេងចាញ់ ក្រុមកូរ៉េ។

បញ្ជាក់ថា ការប្រកួតរវាង U-23 កម្ពុជា ជាមួយ U-23 ជប៉ុន នឹងធ្វើឡើងនៅ ថ្ងៃទី ២០ ខែកញ្ញា ឆ្នាំ ២០២២ ស្អែកនេះ វេលាម៉ោង ៧:០០ នាទីយប់ នាពហុកីឡដ្ឋានជាតិមរតកតេជោ ដោយមានការផ្សាយផ្ទាល់តាមរយៈ BTV News ផងដែរ៕

អត្ថបទ៖ មន្នីរ័ត្ន