កីឡា

ល្អមើលថ្ងៃនេះ បឹងកេត ប៉ះ EDC ខណៈ ភ្នំពេញក្រោន ប៉ះ វិសាខា វគ្គពាក់កណ្តាលផ្តាច់ព្រ័ត្រ HUN SEN CUP

បានផុស

២ years មុន

នៅ

ថ្ងៃពុធ ៥ តុលា ២០២២

ដោយ

វគ្គកាន់តែពិសេស កាន់តែគួរឲ្យចាប់អារម្មណ៍នៃពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៦ ឆ្នាំ២០២២ ឈានដល់វគ្គពាក់កណ្តាលផ្តាច់ព្រ័ត្រហើយនាថ្ងៃទី៥ ខែតុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បឹងកេត បើកទ្វារកីឡដ្ឋាន ខេមបូឌាអ៊ែវ៉េ វេលាម៉ោង៣:៣០នាទីរសៀលនេះទទួលស្វាគមន៍ក្រុមកំពុងឡើង អគ្គីសនីកម្ពុជា។ អគ្គិសនីបង្កការភ្ញាក់ផ្អើលខ្លាំងមែនទែនក្នុងរដូវកាលនេះ បន្ទាប់ពីទម្លាក់ក្រុមខ្លាំងជាបន្តបន្ទាប់។ វគ្គ១៦ក្រុមចុងក្រោយ ក្រុមនេះបានយកឈ្នះគិរីវង់សុខសែនជ័យទាំងពីរជើង ៤-៣។ នៅវគ្គ៨ក្រុមចុងក្រោយ អគ្គិសនីកម្ពុជា បានទម្លាក់ក្រុមព្រះខ័នរាជស្វាយរៀងដោយលទ្ធផលទាំងពីរជើង ៤-២ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។

ចំណែក បឹងកេតវិញ នៅវគ្គ១៦ក្រុមចុងក្រោយបានយកឈ្នះ អាយអេសអាយ ដង្កោសែនជ័យដោយលទ្ធផលគ្រាប់បាល់ទាំងពីរជើង ៥-២ និងវគ្គ៨ក្រុមចុងក្រោយបានយកឈ្នះក្រុម កោះកុង អេហ្វស៊ី ដោយលទ្ធផលទាំងពីរជើង ៥-៣។

អគ្គិសនីកម្ពុជានេះជាលើកទី២ហើយដែលបានឡើងមកដល់វគ្គពាក់កណ្តាលផ្តាច់ព្រ័ត្រ បន្ទាប់ពីលើកទី១ កាលពីឆ្នាំ២០១៧ ហើយទទួលបានចំណាត់ថ្នាក់លេខ៣តាមរយៈការទាត់បាល់១១ម៉ែត្រកាត់សេចក្តីឈ្នះបឹងកេត ៥-៤។

បឹងកេតធ្លាប់បានក្លាយជាជើងឯកនៃពានរង្វាន់សម្តេចតេជោនេះ១លើកកាលពីឆ្នាំ២០១៩ និងធ្លាប់ទទួលបានចំណាត់ថ្នាក់លេខ៣ពីរដង និងលេខ៤មួយដង។

អគ្គិសនីកម្ពុជាកំពុងក្លាយជាក្រុមគ្រោះថ្នាក់សម្រាប់ពានរង្វាន់សម្តេចតេជោ ហ៊ុន សែន ដោយសារក្រុមទាំងមូលប្រើប្រាស់កីឡាករក្នុងស្រុកសុទ្ធទាំងការប្រកួតលីគទី២ និងពានរង្វាន់សម្តេចតេជោ ដូច្នេះក្រុមនេះយល់ចិត្តគ្នាខ្លាំងលើទីលាន។

ថ្ងៃនេះដែរ វេលាម៉ោង៦:៣០នាទីល្ងាច ភ្នំពេញក្រោន បើកទ្វារកីឡដ្ឋានរបស់ខ្លួនទទួលក្រុម វិសាខា នៅវគ្គពាក់កណ្តាលផ្តាច់ព្រ័ត្រដូចគ្នា។ វិសាខាជាម្ចាស់ជើងឯកនៃពានរង្វាន់២លើក ខណៈ ភ្នំពេញក្រោនក៏ធ្លាប់ឈ្នះពីរលើកដែរ ប៉ុន្តែអ្វីដែលគួរឲ្យចាប់អារម្មណ៍បំផុតគឺ វិសាខា ឈ្នះពីរលើកចុងក្រោយពោលគឺឆ្នាំ២០២០ និង២០២២ ដូច្នេះជាក្រុមកំពុងការពារតំណែងជើងឯក៕

អត្ថបទ៖ វីរបុត្រ

Related Topics:ពានរង្វាន់សម្ដេចតេជោ ហ៊ុន សែន (Hun Sen Cup)